Propjetà
Tiftaħ l-iskema t’għajnuna fil-ħlas tad-depożitu għax-xiri tal-ewwel dar

Il-Gvern nieda l-iskema tal-Home Deposit biex jgħin persuni taħt l-40 sena jiksbu self mill-banek biex ikunu sidien ta’ darhom. B’din l-iskema, l-Awtorità tad-Djar se tagħmel tajjeb għall-ħlas tad-depożitu sa €17,500 bħala self mingħajr imgħax biex ikunu jistgħu jingħataw self mill-banek li jrid jitħallas fuq medda ta’ 25 sena.

L-Awtorità tad-Djar se tibda tilqa’ applikazzjonijiet għall-iskema tal-Home Deposit maħsuba għal persuni bejn il-21 u d-39 sena li jridu jixtru l-ewwel proprjetà tagħhom. B’din l-iskema, l-Awtorità se tagħmel tajjeb għad-depożitu, sa €17,500, li hu meħtieġ biex il-banek jisilfu flus għax-xiri tal-propjetà. Dan l-ammont irid jitħallas lura f’25 sena, bl-Awtorità se tagħmel tajjeb għall-imgħaxijiet fuqu. L-iskema se titħaddem mal-Bank of Valletta u l-APS bank.

Waqt li elenka d-dettalji tal-iskema, il-Ministru għall-Akkomodazzjoni Soċjali, Roderick Galdes, qal li hemm skontijiet għal min iħallas dan is-self f’10 snin. Qal li l-iskema għandha allokazzjoni ta’ €3 miljun li minnhom se jibbenefikaw madwar 300 applikant li jistgħu jkunu individwi jew koppji.

“Dawn huma ovvjament prezzijiet riċerkati mal-banek u anki nafu li bil-prezz ta’ €175,000, persuna tista’ tixtri appartament komdu sal-lum anki bil-prezzijiet tal-proprjetà,” qal il-Ministru għall-Akkomodazzjoni Soċjali Roderick Galdes.

Il-Ministru għall-Finanzi, Edward Scicluna, qal li skemi bħal dawn juru li l-banek lokali għandhom kuxjenza soċjali. Żied li dan qed isir ukoll fil-kuntest li l-pajjiż jixtieq li aktar nies isiru sidien ta’ darhom għax huwa wkoll investiment għalihom.