COVID-19
Minn nhar il-Ġimgħa se jiġu rilaxxati kważi l-miżuri kollha, iżda l-maskri se jibqgħu jintlibsu

Minn nhar il-Ġimgħa 5 ta’ Ġunju se jiġu rilaxxati l-maġġoranza tal-miżuri restrittivi b’rabta mal-Covid-19. Dan ħabbru l-Prim Ministru Robert Abela waqt konferenza tal-aħbarijiet minn Kastilja llejla.

Qal li fil-5 ta’ Ġunju ħa jitneħħew il-kumplament ta’ miżuri restrittivi, u qal li se jiġu ffaċilitati l-affarijiet, waqt li jinżamm il-prinċipju tas-saħħa l-ewwel. Qal li dan huwa possibbli għax fl-aħħar ġimgħat għamilna evalwazzjoni ta’ x’kien u x’ma kienx effettiv biex titwaqqaf l-imxija.

Qal li l-Gvern se jżomm tliet miżuri ta’ mitigazzjoni sempliċi waqt li jiġu rilaxxati l-miżuri l-oħra; id-distanza soċjali, l-iġjene u l-ħasil tal-idejn, u l-ilbies tal-maskri f’ċertu postijiet.

Il-Prim Ministru żied li min-nhar it-Tnejn ħa jitħabbar baġit li sejjaħlu multimiljunarju, u se jikkonsisti f’miżuri ġodda li jinċentivaw l-ekonomija u n-negozju, wara li minn nhar il-Ġimgħa kulħadd se jkun jista’ jmur għax-xogħol, inkluż persuni meqjusa vulnerabbli.

Dr Abela qal li fejn jidħol contact sports, dan għadu ma jistax isir għalissa. Qal li r-risk assessments daħlu fid-dettal u mhux irrakomandat li l-ftuħ tal-contact sport f’dan iż-żmien.

Id-dettalji dwar ir-rilaxx tal-miżuri qed jingħataw fl-istess konferenza mid-Deputat Prim Ministru u Ministru għas-Saħħa Chris Fearne u s-Supretendent tas-Saħħa Charmaine Gauci.

Segwi l-konferenza hawn: