Barranin
Miżuri drastiċi biex inaqqsu t-turisti xurbana f’Ibiża u Magaluf

Il-Gżejjer Baleariċi ta’ Spanja għaddew liġi li tipprojbixxi l-‘pub crawls’ u l-‘happy hours’ fi tliet destinazzjonijiet popolari, bil-għan li jnaqqsu l-ammont ta’ turisti xurbana.

Il-postijiet milquta huma Sant Antoni f’Ibiża, u Playa de Palma u Magaluf f’Majorca. Din hija l-ewwel liġi ta’ dan it-tip fl-Ewropa. Il-miżura, li ddaħħlet fis-seħħ il-Ġimgħa, saret apposta mill-awtoritajiet biex tnaqqas ix-xorb f’dawn il-gżejjer.

Dawn it-tliet postijiet huma magħrufa għall-ammont ta’ festivals u parties, speċjalment fix-xhur tas-Sajf.

Il-liġi l-ġdida tgħid li ‘pub crawls’ la jistgħu isiru u lanqas jiġu reklamati. Twaqqaf ukoll reklamar ta’ ‘happy hours’, kif ukoll ‘boat parties’. Ħwienet li jbiegħu ix-xorb iridu wkoll jagħlqu l-bibien tagħhom bejn 21:30 u 08:00.

Negozji li ma jobdux dawn ir-regolamenti jistgħu jeħlu multi sa’ €600,000, jew jiġu mġiegħla jagħlqu għal perjodu ta’ tliet snin.