Malta bi tkabbir ekonomiku iżjed minn 3 darbiet mill-medja tal-pajjiżi tal-UE

Ċertifikat ieħor għall-ekonomija mill-aġenzija internazzjonali tal-credit ratings, DBRS li kkonfermat ir-rating fil-livell A bi prospetti stabbli. L-aġenzija qalet li Malta kellha tkabbir ekonomiku iżjed minn tliet darbiet aktar mill-medja tal-pajjiżi tal-Unjoni Ewropea, għalkemm osservat ukoll li għandha oqsma li jistgħu jkunu problematiċi biex isostni t-tkabbir.

L-ekonomisti tal-aġenzija DBRS qalu li kklassifikaw lill-ekonomija Malta fil-livell A minħabba li l-ekonomija Maltija s-sena li għaddiet kompliet tikber b’rati ta’ 7 fil-mija u żammet ir-ritmu tas-sena ta’ qabel. L-aġenzija qed tbassir li t-tkabbir ekonomiku ser jimmodera kemm minħabba fatturi internazzjonali kif ukoll għax l-ekonomija laħqet kważi l-kapaċità tagħha.

L-ekonomisti nnutaw li l-finanzi tal-Gvern kienu mgħejjuna mit-tkabbir ekonomiku bir-riżultat li l-Gvern reġa’ kellu bilanċ fil-budget waqt li d-dejn naqas għal 46% tal-Prodott Domestiku Gross. Żiedu jgħidu li surplus fil-finanzi tal-Gvern inkiseb anke mingħajr id-dħul mill-programm taċ-ċittadinanza b’investiment. L-aġenzija DBRS qalet li x-xejra tat-tnaqqis fid-dejn tal-Gvern ser tkompli. Osservat ukoll tibdil regolatorju u fil-qasam tal-ġustizzja u qalet li fis-sena li ġejja dan ser ikompli jtejjeb il-governanza. Attribwiet ukoll ir-rating f’dan il-livell ogħli minħabba li Malta hija fl-Ewropa u qed timplimenta r-regoli taż-żona ewro.

L-ekonomisti qalu li fatturi oħra li kkunsidraw huma r-rata għolja ta’ tifdil. Żiedu jgħidu li l-ekonomija Maltija hija miftuħa għal fatturi barranin minħabba d-dipendenza tagħha fuq setturi bħat-turiżmu, is-servizzi finanzjarji u l-gaming. Wissew li tibdil fir-regoli tat-taxxa u perċezzjoni ta’ nuqqas ta’ governanza jistgħu jolqtu ħażin l-ekonomija Maltija għax tkun tidher inqas attraenti għall-investiment. DBRS qalet li aspetti oħra li jista’ jkollhom impatt fuq il-ġejjieni tal-ekonomija Maltija huma l-piżijiet tal-intrapriżi statali u l-piż tas-sistema tal-pensjonijiet.

L-ekonomisti internazzjonali osservaw li miżuri fis-suq fosthom biż-żieda bil-ħaddiema nisa, il-ħaddiema barranin u aktar anzjani li jibqgħu fis-suq tax-xogħol evitaw l-effetti tal-inflazzjonarji fl-ekonomija waqt li din qed tieħu wkoll il-benefiċċji tar-riformi li saru fis-settur tal-enerġija. Huma qalu li l-Brexit, it-tibdil fir-regoli tat-taxxa fl-Unjoni Ewropea, in-nuqqas ta’ ħaddiema u l-problema fl-infrastruttura jistgħu jkunu problematiċi għas-sostenn tal-ekonomija. Ikkumentaw ukoll fuq miżuri li ttieħdu mill-gvern biex ikunu indirizzati dawn l-isfidi għalkemm qalu li jrid isir iżjed fuq in-nefqiet għal pensjoni u għas-saħħa.

Dwar is-settur tal-banek, DBRS qalet li l-banek lokali huma konservattivi u l-prudenza tagħhom tagħti saħħa lis-sistema finanzjarja. Żiedu jgħidu li t-tkattir tal-miżuri u l-inizjattivi li qed jittieħdu kontra l-ħasil tal-flus iridu jisskutaw biex ma ssirx aktar ħsara lir-reputazzjoni tal-pajjiż.

Aħbarijiet Oħra
COVID-19

L-Assoċjazzjoni Medika Maltija, MAM, u l-Union tal-Infermiera u l-Qwiebel, MUMN, ħabbru azzjoni industrijali fid-dawl li l-attivitajiet tal-massa ma twaqqfux milli jiġu organizzati waqt il-pandemija tal-Covid. Il-MAM ordnat sensiela ta’ direttivi…

Lokali

Bejn din is-sena u s-sena li ġejja fiż-żona tat-tlett ibliet u l-Kalkara se jkunu qed isiru mal-25 proġett ta’ restawr varji fosthom fuq il-Forti Ricasoli, s-swar ta’ Santa Margerita u…

Lokali

Melvin Theuma, l-intermedjarju fil-qtil ta’ Daphne Caruana Galizia, baqa’ f’qagħda stabbli. Fi stqarrija l-Pulizija qalet li Theuma għadu fit-taqsima tal-ENT fl-isptar Mater Dei. It-Tlieta 21 ta’ Lulju 2020, Theuma nstab…

COVID-19

L-organizzaturi tal-attivitajiet li jinqabdu jiksru r-regoli tal-miżuri mħabbra mill-Awtoritajiet tas-Saħħa biex iwaqqfu l-imxija tal-Covid-19 jistgħu jeħlu multa ta’ €3,000 għal kull miżura li jiksru. Dan tħabbar illum f’avviż legali ppubblikat…

Aktar