Kultura
Oġġetti mill-kollezzjoni tal-Kaptan Jacques Cousteau se jiġu esebiti f’Malta

Fil-Mużew Marittimu fil-Birgu se jkun hemm esebizzjoni li tiċċelebra l-legat tal-esploratur marittimu, Jacques Cousteau, u l-konnessjoni tiegħu ma’ Malta permezz tal-vapur ‘Calypso’, li wara li baħħar bi vjaġġi bejn Malta u Għawdex spiċċa f’idejn dan l-esploratur Franciż fil-bosta avventuri tiegħu.

Jacques Cousteau kien uffiċjal Navali Franċiz, esploratur, konservazzjonista, produttur tal-films, innovatur, xjenzat, fotografu, awtur u riċerkatur li studja l-baħar u l-kreaturi akwatiċi.

Kien strumentali, fost oħrajn, biex jiżviluppa l-Aqua Lung, u kkontribwixxa qatigħ biex ikattar l-istudju dwar il-ħajja marittima.

Il-konnessjoni ta’ Cousteau ma’ Malta kien il-vapur Calypso li utilizza f’ħafna mill-missjonijiet tiegħu. Dal-vapur kien tan-navy Ingliża, sakemm inxtara minn imprenditur Malti u għal erba’ xhur serva bħala vapur għall-ġarr tal-passiġġieri u l-posta bejn Malta u Għawdex. Cousteau akkwista l-vapur biex iwettaq riċerka marittima.

Bintu, Diane Cousteau, qalet li l-baħar kien bħal kalamita għal Cousteau, u kellu xewqa li jfiehem lill-pubbliku dwar kunċetti fl-ambjent marittimu.

“We’re going to do an exhibition about the history about Jacques Cousteau’s ship Calypso… and this is a ship that my father found in Malta, and this is where the ship received her name, so it seems like it’s the perfect place to tell the story about the ship,” qalet Diane Cousteau.

Il-vapur Calpyso sar ikona fil-vjaġġi ta’ Cousteau, u meta fl-1996 għereq f’inċident f’Singapore, huwa eventwalment kien irranġat. Il-Kaptan Cousteau, li tul l-karriera tiegħu pproduċa aktar minn 120 film u iżjed minn 50 ktieb, miet sena wara l-incident, fl-età ta’ 87 sena.

Il-konnessjoni tal-esploratur Franċiż ma’ Malta se tkun issiġġilata b’kollaborazzjoni bejn Heritage Malta u l-Fondazzjoni Cousteau, li fl-2021 se jesebixxu fil-Mużew Marittimu fil-Birgu għażla ta’ oġġetti li kienu jintużaw mill-Kaptan Cousteau. L-esebiti se jinkludu majjiera tal-injam li ttieħdet mill-vapur Calyspo, li se tkun mogħtija lil Heritage Malta biex tifforma parti mill-kollezzjoni nazzjonali.

Il-Ministru tal-Ġustizzja u Kultura, Owen Bonnici, qal li l-esebizjoni se tkompli ssaħħaħ ir-reputazzjoni ta’ Malta fil-qasam tal-istorja marittima. Qal li permezz tal-esebizzjoni, il-mużew se jiddiskuti temi bħat-tniġġis tal-baħar u aspetti oħra relatati mal-ħajja tal-baħar u l-importanza tal-oċeani.

“Bis-saħħa ta’ ftehim li għamilna mal-familja ta’ Jacques Cousteau, kulħadd jiftakar l-episodji tal-kaptan Cousteau, nistgħu dan il-post nittrasformawh f’post li jkun uniku fid-dinja għax ikun il-post li jagħti esperjenza li normalment trid issiefer barra minn Malta biex tgawdiha,” qal il-Ministru.

L-esebizzjoni se tkun għall-wiri fl-2021 meta jintemmu x-xogħlijiet ta’ estensjoni fil-Mużew Marittimu.

Aħbarijiet Oħra
Storja

Magna ta’ ajruplan tal-gwerra, li possibilment iġġarraf fit-Tieni Gwerra Dinija, kienet irkurprata minn qiegħ il-baħar fil-bokka tal-Port il-Kbir wara ħidma konġunta bejn l-Università ta’ Malta, Heritage Malta u l-Forzi Armati….

Teknoloġija

Wara l-ajruplani, issa anke l-vetturi bdew jiġu jiġu mgħammra b’kaxxa sewda, li normalment tkun f’nofs il-vettura. Għalkemm s’issa din mhijiex obbligatorja, aktar manifatturi tal-karozzi qed jinkluduha. Fost aktar miżuri biex…

Infrastruttura

Waħda mill-kawżi ewlenin ta’ ħruġ ta’ drenaġġ fit-triq u fil-baħar ġejja minn katusi tal-ilma tax-xita li qed jitqabbdu direttament mas-sistema tad-drenaġġ. Jirriżulta li ħafna ma jafux li dan hu l-każ…

NGOs

Seba’ għaqdiet mhux governattivi Maltin se jwettqu tmien proġetti fl-Afrika bl-għajnuna ta’ madwar nofs miljun ewro mill-programm tal-għajnuna għall-iżvilupp tal-Ministeru tal-Affarijiet Barranin. Il-proġetti jvarjaw minn skola ġdida għall-bniet f’żona rurali…

Aktar