Bħalissa l-membri tal-Protezzjoni Ċivili qed jaħdmu biex jikkontrollaw nar li beda fil-Miżieb. Dan mhuwiex każ iżolat, hekk kif il-Protezzjoni Ċivili għaddejja b’ħidma bla waqfien fuq sejħiet ta’ nirien f’widien u għelieqi.

Dawn il-każijiet huma komuni għall-istaġun sajfi, iżda din is-sena l-pumpiera jinsabu b’ilsienhom barra iktar mis-soltu, minħabba li kellna xitwa qalila u kiber iktar ħaxix mis-soltu.

Il-pumpiera bla nifs b’sejħa wara l-oħra

Id-Direttur tal-Protezzjoni Ċivili, Emmanuel Psaila, qal lil TVM li din is-sena s-sħana bdiet ftit iktar tard mis-soltu, u għalhekk ittardjaw ukoll il-‘grass fires’. Iżda issa li bdew, il-pumpiera mhux qed jieħdu nifs, b’sejħa wara l-oħra.

Is-Sur Psaila spjega li jkun hemm nirien żgħar li jieħdu ftit ħin, u nirien ikbar, bħal dak li għaddej fil-Miżieb bħalissa, li jaf jieħdu ġurnata sħiħa biex jiġu kkontrollati u jintfew. Meta tkun iż-żiffa tiżdied l-uġigħ ta’ ras għall-pumpiera, għax in-nar jibda jinfirex iktar malajr.

X’jista’ jsir biex dawn in-nirien jonqsu?

Is-Sur Psaila qal li dawn in-nirien jistgħu jonqsu kieku l-bdiewa jaħsdu u jwarrbu l-ħaxix qabel ma tibda s-sħana, u l-Kunsilli Lokali jieħdu ħsieb ineħħu l-ħaxix ħażin minn żoni pubbliċi li jaqgħu taħthom.

Naqra iktar attenzjoni meta wieħed, eżempju, jarmi sigarett, ukoll tista’ tagħmel differenza kbira, għax għalkemm nar jista’ jaqbad bi ħġieġ u karti, is-Sur Psaila jemmen li n-nirien jibdew minn ġamar bħal tas-sigaretti.