Lokali
Nirien Marsaskala: Inkjesta Maġisterjali se tiddeċiedi jekk is-CPD damux ma waslu

Issoktaw l-investigazzjonijiet wara l-inċident fatali tal-Ħadd filgħodu li fih tilef ħajtu Gordon Spiteri, ta’ 35 sena. L-awtopsja ikkonfermat li Spiteri miet kawża tad-duħħan li bela’ f’nar li żviluppa f’appartament tal-blokk fejn kien joqgħod fi Triq l-Aħmar f’Wied il-Għajn. Il-Maġistrat Joe Mifsud li qed imexxi l-inkjesta awtorizza r-rilaxx tal-katavru għad-difina. Sadanittant, TVM huwa infurmat li qed isiru investigazzjonijiet separati dwar allegazzjoni li l-membri tal-Protezzjoni Ċivili damu ma waslu fuq il-post.

Ħadd mis-sitt persuni li ddaħħlu l-isptar wara n-nirien li ħakmu appartament f’Wied il-Għajn ma kien f’kundizzjoni gravi u ħadd minnhom m’għadu qed jinżamm l-isptar. Fosthom Lara Calleja u Josianne Micallef li kienu fl-appartament fejn in-nar x’aktarx minn heater. Calleja għalkemm għadha taħt xokk, ilmentat ma’ TVM li għalkemm ċemplet erba’ darbiet fuq in-numru tal-emerġenza, 112, il-membri tal-protezzjoni ċivili, skont hi ħadu 35 minuta sakemm waslu minn Kordin sa Wied il-Għajn.

Huwa mifhum li l-awtoritajiet konċernati ntalbu l-log tat-telefonati anke għall-inkjesta maġisterjali. Sorsi infurmati qalu lil TVM li l-vetturi tat-tifi tan-nar ħarġu mill-istazzjon ta’ Kordin erba’ minuti wara li kienu infurmati bin-nirien u fi żmien 14-il minuta kienu diġà f’Wied il-Għajn. L-istess sorsi qalu li seta’ kien hemm ftit dewmien sakemm waslu fuq il-post minħabba l-blokk jinsab f’geġġwiġija ta’ toroq. Gordon Spiteri li kien il-vittma ta’ dan l-inċident kien diġà fl-ambulanza sa nofs siegħa wara li saret it-telefonata.

L-awtopsja li saret it-Tnejn filgħodu kkonfermat li Gordon Spiteri ma mietx bin-nar iżda bid-duħħan li bela’. Huwa nstab fil-parti komuni tal-blokk sular ‘il fuq mill-appartament li nħakem min-nirien.

Mill-investigazzjonijiet li saru jirriżulta li n-nar beda meta ż-żewġ tfajliet Lara Calleja u Josienne Micallef kienu reqdin. Waħda minnhom qamet maħsuda bi spluzzjoni u rat il-heater tal-elettriku jaqbad. Dak il-ħin huma ppruvaw jgħattu l-heater b’borma, iżda kif raw li n-nar infirex mal-għamara, ħarġu jiġru ‘l barra.

L-ewwel ma waslu fuq il-post kienu surġent u kuntistabbli mill-Għassa ta’ Wied il-Għajn u bdew jassistu lir-residenti kollha tal-blokk sabiex joħorġu ‘l barra. Wara huma staqsew jekk fadalx xi ħadd ġewwa, ġew infurmati li fl-appartament numru 5 kien joqgħod Gordon. Wieħed mir-residenti qal lil pulizija li ra lil Gordon fil-gallerija u qallu biex jipprova jitla’ fil-penthouse sabiex joħorġu minn fuq il-bejt, madankollu minħabba d-duħħan iswed ma jafx x’ġara.

Il-Pulizija daħlu fil-komun u bdew jisimgħuh jgħajjat għall-għajnuna. Huma tawh struzzjonijiet sabiex jinżel ‘l isfel peress li d-duħħan kien fis-sulari ta’ fuq. Għal xi raġuni huwa baqa’ fuq u beda jinstema’ jgħajjat biex xi ħadd jiftaħlu l-bieb, sakemm semgħu ħġieġa tinkiser u lil Gordon ma semgħux iżjed.

Il-membri tal-Protezzjoni Ċivili sabuh mitluf minn sensih fil-indana tat-taraġ quddiem il-penthouse. It-tim mediku ippruva jsalvalu ħajtu iżda ġie ċċertifikat mejjet fl-isptar.

Aħbarijiet Oħra
Gazzetti

Ħarsa lejn l-istejjer ewlenin fil-ġurnali tal-lum, il-Ħadd 23 ta’ Settembru, 2018 The Malta Independent Timmarka d-demostrazzjoni li saret kontra l-vjolenza domestika fil-Belt Valletta. Rapport ieħor jgħid li dawk li jaħdmu…

Televiżjoni u Radju

Lejn tmiem is-snin 30 l-awtoritajiet Taljani fil-Libja kienu konvinti li l-Maltin ta’ Tripli kienu qed jibagħtu żgħażagħ mill-komunità tagħhom lejn Malta biex jidħlu fl-armata Ingliza. Aktar minn hekk, l-awtoritajiet Taljani…

Renju Unit

Meta r-Renju Unit joħroġ mill-Unjoni Ewropea, ċittadini tal-Unjoni Ewropea, fosthom il-Maltin, li ilhom jgħixu fir-Renju Unit għal tal-inqas ħames snin se jkunu intitolati għal dokument ġdid ta’ residenza msejjaħ settled…

Aktar