Unjoni Ewropea
Pass eqreb biex Malta tibqa’ bil-ħin tas-sajf

Malta deċiża li żżomm il-ħin tas-sajf, għalkemm deċiżjoni finali f’livell Ewropew għad trid tittieħed. Kumitat tal-Parlament Ewropew qabel li d-direttiva Ewropea li qed tkun diskussa, tagħti għażla lill-pajjiżi membri tal-Unjoni Ewropea jekk iżommux il-ħin jew il-ħin tax-xitwa s-sena kollha.

Kelliem għall-Ministeru tal-Affarijiet Ewropej qal lil TVM li l-Gvern Malti fil-kunsill tal-Ministri ser ikompli jisħaq dwar uniformità f’din id-deċiżjoni għall-pajjiżi kollha tal-Unjoni Ewropea.

Waqt li l-Kumitat għat-Trasport u t-Turiżmu tal-Parlament Ewropew approva l-proposta tal-Kummissjoni Ewropea biex l-arloġġi ma jitmexxewx ‘il quddiem jew lura darbtejn fis-sena, id-deċiżjoni mhix finali. Dan għax id-diskussjonijiet bejn il-Parlament Ewropew u l-Kunsill tal-Ministri għadhom għaddejjin.

Kelliem għall-Ministeru għall-Affarijiet Ewropej qal lil Television Malta li rapport li sar is-sena l-oħra waqt il-Presidenza Awstrijaka wera li l-pajjiżi membri tal-Unjoni Ewropea jridu jixtarru aktar din il-kwistjoni. Il-kelliem żied li n-negozjati dwar din id-direttiva waqfu fl-aħħar tas-sena li għaddiet wara li fil-Kunsill tal-Ministri, diversi pajjiżi ħassew il-ħtieġa li jikkonsultaw ma’ iktar imsieħba soċjali. Qal li l-Kummissjoni Ewropea anke ntalbet tħejji studju dwar l-impatt ta’ din il-proposta fuq setturi differenti.

Waqt li f’livell ta’ gvernijiet, id-diskussjoni għad trid tkompli, Kumitat tal-Parlament Ewropew qabel li jħalli f’idejn il-pajjiżi Ewropej li jridu l-ħin tas-sajf jekk idawrux l-arloġġ għall-aħħar darba fl-aħħar Ħadd ta’ Marzu tal-2021, waqt li dawk li jippreferu l-ħin tax-xitwa idawru l-arloġġ lura għall-aħħar darba f’Ottubru tal-istess sena.

“It has been decided that we will continue to work on the proposal, which means that we will no longer stick to the winter and summer time change every year, but rather that it will be abolished, and then each Member State can decide what they prefer, permanent winter time or permanent summer time,” qalet Marita Ulvskog, Rapporteur.

Wara li t-test jiġi approvat mill-Parlament Ewropew, l-ewro-parlamentari jkollhom pożizzjoni finali għan-negozjar mal-Kunsill tal-Ministri.

F’każ li l-Kummissjoni Ewropea tiddetermina li l-arranġamenti tal-ħin prevvisti jistgħu jfixklu b’mod sinifikanti l-mod kif jaħdem is-suq uniku Ewropew, il-Kummissjoni tkun lesta li tipposponi din id-direttiva b’sena u tagħmel proposta leġiżlattiva ġdida.

Aħbarijiet Oħra
Lokali

L-għodwa għal John Cortis minn Ħal Qormi ma kinitx bħas-soltu. Ma’ TVM spjega li dalgħodu xħin qam xamm riħa ta’ ħruq u sema’ xi tfaqqigħ bħal bombi tal-festa. Huwa ħaseb…

Qorti

Kaled Muktahar Ben Gamhur ġie kkundannat 18-il xahar priġunerija. Huwa ammetta li seraq €118 u mobile minn karozza fil-15 ta’ Ġunju li għadda. L-akkużat kkommetta dan ir-reat ix-xahar li għadda…

Kronaka

Nirien żgħar ħakmu f’restaurant fil-Gżira. Il-każ seħħ għall-ħabta tas-7.30am fi Triq ix-Xatt. In-nirien li żviluppaw f’restaurant ġew ikkontrollati mill-membri tal-Protezzjoni Ċivili . Dak il-ħin ma kien hemm ħadd ġewwa. Kelliema…

Saħħa

Is-Segretarju Parlamentari għall-Anzjanità Attiva, Anthony Agius Decelis ħabbar proġett pilota li se jibda mill-ġimgħa d-dieħla fejn anzjani li ma jistgħux joħorġu mid-dar, mill-Mosta u Birkirkara se jkunu jistgħu jitolbu biex…

Aktar