COVID-19
Persuni ma jistgħux iżuru lil xulxin f’xi nħawi fir-Renju Unit

Mil-lum f’ċertu żoni fit-tramuntana tal-Ingilterra persuni li ma jgħixux fl-istess dar, anki jekk huma familji, mhux se jkunu permessi li jżuru lil xulxin. Dan wara żieda fil-każijiet irrappurtati fl-aħħar jiem.

Is-Segretarju tas-Saħħa Matt Hancock qal li dawn il-miżuri ristrettivi lokali japplikaw għal partijiet ta’ Greater Manchester, partijiet ta’ East Lancashire u West Yorkshire.

F’dawn il-postijiet, persuni li ma jgħixux fl-istess dar ma jistgħux lanqas imorru flimkien ġo pub jew restorant, filwaqt li f’Leicester u fi Blackburn, gyms, pixxini u leisure centres mhux permessi jiftħu.

Il-Partit Laburista minn naħa l-oħra kritika l-Gvern ta’ Boris Johnson għal nuqqas ta’ kjarezza f’miżuri li tħabbru fit-tard tal-bieraħ.