Barranin
Pete Buttigieg iniedi l-kampanja tiegħu fit-tellieqa tad-Demokratiċi

Is-sindku Amerikan Pete Buttigieg li huwa ta’ nisel Malti nieda l-kampanja tiegħu fit-tellieqa tad-Demokratiċi biex ikun il-kandidat tagħhom fl-elezzjoni Presidenzjali tas-sena d-dieħla.

Pete, li għandu 37 sena u studja f’Harvard u serva mal-militar Amerikan fl-Afganistan, nieda l-kampanja tiegħu fil-belt ta’ South Bend fl-Istat ta’ Indiana, fejn ilu sindku għal dawn l-aħħar seba’ snin.

Il-midja Amerikana, għalkemm qed isibha diffiċli biex tippronunzja kunjomu, qiegħda tagħtih ħafna pubbliċità minħabba l-kwalitajiet tiegħu fosthom li jitkellem b’seba’ lingwi u li huwa l-ewwel kandidat gay għall-Presidenza Amerikana.

“Right now our country needs a fresh start. I’m Pete Buttigieg, I’m the Mayor of South Bend Indiana.” B’din id-dikjarazzjoni Pete Buttigieg beda l-mixja twila bl-ambizzjoni li jasal sal-White House fl-elezzjoni ta’ President tal-Istati Uniti tal-2020.

Missieru huwa l-Professur Joseph Buttigieg li twieled il-Ħamrun fl-1947 u huwa gradwat mill-Università ta’ Malta. Huwa emigra lejn l-Istati Uniti fl-aħħar tas-sebgħinijiet u ftit wara żżewweġ lil Iskoċċiża Jennifer Montgomery.

Pete twieled fl-Istati Uniti u gradwa f’Harvard University u jitkellem seba’ lingwi, fosthom il-Malti. Fl-2012 ġie elett sindku tal-belt ta’ South Bend fl-istat ta’ Indiana.

Fil-preżenza tar-raġel tiegħu Chasten, Pete Buttigieg qed isejjes il-kampanja tiegħu fuq il-ħtieġa ta’ bidla ġenerazzjonali fl-Istati Uniti.

Jemmen li l-età tiegħu mhix ostaklu għall-ambizjoni tiegħu iżda jgħid li f’dal-mument hija opportunità għall-poplu Amerikan.

Il-kampanja ta’ Buttigieg hija bbażata fuq ideali liberali, li fi kliemu għandhom isawru l-futur tal-Istati Uniti.

Fl-ewwel tliet xhur ta’ din is-sena, l-appoġġ għall-kampanja ta’ Buttigieg issarfet f’għotjiet li laħqu ‘l fuq minn 7 miljun dollaru. Huwa qiegħed itellaq mat-18-il kandidat għan-nomina tad-demokratiċi, bl-għażla ssir f’sensiela ta’ elezzjonijiet primarji.

Aħbarijiet Oħra
Teknoloġija

Huma bosta dawk li fuq il-Facebook qed itellgħu r-ritratt tagħhom ta’ kif se jkunu qed jidhru fil-ġejjieni. Iżda kemm hu għaqli li tagħmel dan? Xi tkun qed tagħmel eżatt meta…

Barranin

Minn tal-inqas 12-il persuna mietu u diversi ndarbu f’attakk fi studio, il-Ġappun. Skont midja Ġappuniża raġel daħal fi Kyoto Animation Co studio u sprejja xi likwidu. Kawża t’hekk ħadu xi…

Barranin

Fl-istat ta’ Massachusetts l-Istati Uniti l-prosekuturi waqqgħu l-akkuża kriminali kontra l-attur Kevin Spacey. Spacey ta’ 59 sena kien akkużat li abbuża sesswalment minn ġuvni ta’ 18-il sena tliet snin ġo…

Barranin

Fil-belt ta’ Sinaloa fil-Messiku, in-nies ferħet għall-aħbar li fl-Istati Uniti, il-kap tal-ikbar ċirku ta’ traffikar ta’ droga bejn il-Messiku u l-Istati Uniti, Joaquin El Chapo Guzman, ingħata sentenza ta’ għomor…

Aktar