Lokali
Propost li t-tobba kollha jitħallew jagħtu mediċini b’sustanza tal-kannabis

L-użu ta’ mediċinali magħmula mill-pjanta tal-kannabis ser ikun iktar aċċessibbli għall-pazjenti li jeħtieġu din il-mediċina, li madankollu xorta trid tinkiseb b’riċetta tat-tabib u b’kontrolli mis-supretendent tas-saħħa pubblika. Id-Deputat Prim Ministru u Ministru tas-Saħħa Chris Fearne, waqt li ressaq l-ewwel qari tal-emendi fil-liġi, spjega fost oħrajn li mhux ser ikun ittollerat li din il-mediċina tinxtara minn fuq l-internet.

Għalkemm ser isiru emendi fil-liġi biex it-tobba jkunu jistgħu jagħtu mediċina maħduma mill-kannabis għal ċerti kundizzjonijiet kroniċi, mhux ser ikun permess li dawn il-mediċini jkunu forma ta’ tabakk, u lanqas ser ikun permess li jitkabbru pjanti tal-kannabis.

Dan tħabbar mid-Deputat Prim Ministru u Ministru tas-Saħħa Chris Fearne f’konferenza tal-aħbarijiet qabel ressaq għall-ewwel qari l-emendi fil-liġi dwar l-użu tal-mediċinali magħmula mill-kannabis. Dr Fearne qal li dawn l-emendi se jindirizzaw ilmenti li rċivew mingħand mijiet ta’ pazjenti u tobba minħabba li l-liġi li daħlet sentejn ilu kienet restrittiva wisq għaliex ir-riċetta għal dawn il-mediċini kienet qed tingħata biss mill-ispeċjalista u mhux mit-tobba tal-familja.

“Qed ngħidu ċar u tond li l-ebda prodott ma jista’ jkun forma ta’ tipjip. Hemm tablets, spray u żjut li wieħed jista’ juża f’forma ta’ gmp, dejjem taħt preskrizzjoni tat-tabib,” qal id-Deputat Prim Ministru. “Ħa nkunu qed ngħidu ukoll li prodotti se jkunu jistgħu jiġu impurtati fil-pajjiż u jintużaw għall-użu mediċinali huma dawk li huma mediċini u li huma magħmula minn gmp.”

Dr Fearne qal li din id-diskussjoni hija waħda separata minn dik dwar l-użu rikreazzjonali tal-kannabis. Qal li mhux se jkun permess li wieħed jixtri prodotti li fihom sustanza tal-kannabis minn fuq l-internet, waqt li żied jgħid li r-riċetta tat-tabib tista’ ssir billi tingħata l-kartuna l-ħadra għal iktar kontroll.

Is-Supretendent tas-Saħħa Pubblika Charmaine Gauci qalet li dawn il-prodotti se jkunu ta’ għajnuna għal diversi pazjenti. “Dawn il-mediċini jintużaw l-iktar meta jkollok kundizzjonijiet ta’ mard kroniku biex tnaqqas l-uġiegħ ikkanġunati minnhom,” spjegat Dr Gauci. “Tista’ tintuża f’sitwazzonijiet ta’ tista’ mard ta’ spastiċità ħafna bħal multiple sclerosis. Tista’ tintuża biex tnaqqas sintomi ta’ dardir u remettar għal dawk li jieħdu kimoterapija.”

Mistoqsi jekk hux se jkunu jistgħu jitkabbru pjanti tal-kannabis f’Malta għall-użu mediċinali, Dr Fearne qal li dan mhux se jkun possibbli. Huwa qal ukoll li l-Ministru tal-Ekonomija se jresseq emendi għal tibdil fil-liġi biex prodotti mediċinali magħmulin minn sustanza tal-kannabis ikunu jistgħu jiġu manifatturati f’Malta.

Aħbarijiet Oħra
Knisja Maltija

Riċerka ppubblikata fl-aħħar jiem tixħet dawl dwar l-ewwel attentati għas-separazzjoni tal-poteri bejn Stat u Knisja f’Malta. Kien Nicolo’ Muscat – figura prominenti fl-amministrazzjoni tal-Ordni tal-Kavallieri – li f’nofs is-seklu 18…

Lokali

Ġimgħa wara d-delitt ta’ omm żagħżugħa f’Raħal Ġdid li allegatament inqatlet mis-sieħeb tagħha, bosta għaqdiet speċjalment tan-nisa komplew jitkellmu b’diversi stqarrijiet dwar dan il-femiċidju u l-problema tal-vjolenza domestika. Mill-banda l-oħra…

Annimali

L-Assoċjazzjoni Exotic Finch Malta qed tagħti opportunità oħra lill-pubblika japprezza l-ġmiel ta’ 500 għasfur li minkejja li l-oriġini tagħhom hija barranija tfaqqsu f’Malta wara ħafna studju u esperementazzjoni. Il-wirja li…

Lokali

Il-Malta National Electromobility Platform fi ħdan Transport Malta qed tikkordina diversi inizjattivi u attivitajiet marbuta mal-Ġimgħa Ewropea Tal-Mobbiltà. It-tema għal din is-sena hija “Multimodality – Mix and Move”. Din it-tema…

Aktar