Barranin
Pulizija akkużat bil-qtil ta’ eks-plejer tal-futbol

Uffiċċjal tal-Pulizija ġie akkużat bil-qtil tal-footballer Dalian Atkinson, f’każ li jmur lura għall-2016.

Atkinson, li kien jilgħab ma’ Aston Villa, u li kellu 48 sena meta inqatel, miet wara li ingħata xokkijiet permezz ta’ taser, fid-dar ta’ missieru f’Telford fl-Ingilterra, fil-15 t’Awwissu.

Pulizija ieħor, mill-‘West Mercia Police Force’, ukoll qed jiġi akkużat b’agressjoni u li kkawża ġrieħi fuq il-vittma.

Iż-żewġ Pulizija fil-fatt se jidħru quddiem il-Qorti tal-Maġistrati f’Birmingham.

Il-‘Crown Prosecution Service’ għamlet id-deċiżjoni li tressaq lill-akkużati, wara investigazzjoni indipendeti mill-Pulizija stess.

Intqal kif il-familja ta’ Atkinson ġiet infurmata bl-iżviluppi fil-każ, u fi stqarrija qalu li huwa tajjeb li min qatlu se jitressaq għall-ġustizzja, iżda wrew id-diżappunt tagħhom għal fatt li għaddew iktar minn tliet snin minn mindu miet Dalian Atkinson.