Ambjent
Qed jiżdied l-iskart fuq il-bajjiet mill-ikel tat-‘takeaway’

Qabel ma jibdew jinġabru n-nies fuq il-bajjiet, ħaddiema tad-Diviżjoni tal-Manutenzjoni u t-Tindif ikunu diġà hemm biex jiġbru l-iskart li jkun tħalla lejliet, inaddfu, u din is-sena jiddiżinfettaw ukoll. Sa Ottubru, it-tindif isir kull filgħodu – f’ċerti bajjiet isir darbtejn u anke tliet darbiet kuljum.

Id-Direttur tad-Diviżjoni, Ramon Deguara, qal li mis-sena li għaddiet sal-lum inġabru ‘l fuq minn 535 tunnellata ta’ skart mill-bajjiet kollha. Inġabret ukoll mal-2,840 tunnellata ta’ alka.

“Għandek tbattil tal-kontenituri tal-iskart, għandek it-tindif fuq ir-ramel ovvjament u ma nitkellmux biss fuq il-bajjiet ramlin – nitkellmu wkoll fuq il-bajjiet kollha madwar il-kosta li għandna madwar 52 bajja madwar il-pajjiż,’ spjega s-Sur Deguara.

Is-Sur Deguara nnota li din is-sena kien hemm żieda fil-kwantità ta’ skart li qed jinġabar mill-mija u għaxar ħaddiem responsabbli mit-tindif tal-bajjiet. “Għandna dawn il-kumpaniji li jqassmu, jagħmlu deliveries tat-take away , u ovvjament qed naraw trend ġdida li fuq il-bajjiet tagħna qed naraw żieda drastika fl-iskart li jikkonċerna kontenituri tat-take away u affarijiet hekk.”

Żied jgħid li jekk din it-tendenza tippersisti, id-Diviżjoni tal-Manutenzjoni u t-Tindif se tikkunsidra li sena oħra żżid il-kontenituri tal-iskart fuq il-bajjiet. Spjega li minħabba l-pandemija tal-coronavirus qed isir diżinfettazzjoni fuq il-bajjiet.

“Għandna l-ħaddiema tagħna li jkunu qed jagħmlu diżinfettar ta’ kontenituri tal-iskart fuq bajja bir-ramel, kif ukoll bajjiet fejn għandna l-blat, fejn għandna handrails, fejn għandna slielem – fejn għandna equipment ieħor prattikament kollha jiġu sanitized darbtejn – tlieta kuljum.”

Intant, din id-Diviżjoni hija responsabbli wkoll għal madwar 300 sellum li jitwaħħlu f’diversi nħawi mal-kosta biex jitjieb l-aċċess għall-baħar fejn hemm il-blat. Tieħu ħsieb ukoll tagħmir ieħor fuq il-bajjiet. Il-ħaddiema jiġbru wkoll ħut u annimali mejta li jinġarru bil-kurrenti għal fuq l-art.

Aħbarijiet Oħra
Ambjent

Il-WasteServ qalet li l-ġbir tal-ħġieġ għar-riċiklaġġ huwa amministrat minn żewġ skemi privati, li huma responsabbli li jiġbru ħġieġ segregat. Il-kumpanija qalet li avżat lil dawn l-iskemi li mhux se taċċetta…

Politika

Il-Prim Ministru Robert Abela sejjaħ laqgħa mal-Kunsill Malti għall-Iżvilupp Ekonomiku u Soċjali skedata għal nhar il-Ħamis li ġej, biex tkun diskussa l-pożizzjoni ta’ Malta fl-isfond tal-pandemija Covid-19. Fi stqarrija maħruġa…

COVID-19

L-awtoritajiet tas-saħħa kkonfermaw 16-il każ ġdid ta’ Covid-19 f’Malta wara li fl-aħħar 24 siegħa saru 1,502 swab test. B’hekk il-każi attivi ta’ Coronavirus f’Malta telgħu għal 215, hekk kif ħadd…

Immigrazzjoni

Il-Ministru għall-Affarijiet Barranin Evarist Bartolo qal li l-ħidma tal-Gvern wasslet biex minn Marzu ‘l hawn mat-3,000 immigrant irregolari twaqqaf milli jiġi f’Malta. Fi stqarrija fuq il-midja soċjali, huwa qal li…

Aktar