Saħħa
Qed jiżdiedu l-każijiet f’Malta ta’ nies li jispiċċaw bla swaba’

Il-kallijiet u d-dwiefer fil-laħam mhumiex biss skumdità imma wkoll sinjal ta’ gwaj li jista’ jiġi kkurat bl-għajnuna ta’ podjatri mħarrġa apposta. Dan hu l-messaġġ li qed twassal l-Assoċjazzjoni Maltija tal-Podjatri fil-jum iddedikat lil din il-professjoni.

Television Malta tkellem mal-podjatra Yvonne Midolo li spjegat li fost oħrajn qed jaraw ukoll aktar każijiet ta’ pazjenti Maltin li jispiċċaw mingħajr swaba’ ta’ saqajhom minħabba infezzjonijiet ikkawżati mid-dijabete.

Yvonne Midolo ilha tmien snin taħdem bħala podjatra; professjonista li tieħu ħsieb il-kura tas-saqajn. Spjegat li l-kallijiet u d-dwiefer morda huma fost l-aktar problemi komuni fil-Maltin.

“Aħna nikkuraw dwiefer li huma morda u dwiefer li jkunu deħlin fil-laħam. Nagħmlu operazzjoni speċifika biex naqilgħu dak id-difer li jkun problematiku. Bħala kallijiet ikunu wġigħ relatat magħhom jiġifieri pazjent ma jkunx jista’ jimxi,” qalet Midolo.

Pjaga li qed tikkawża ħafna problemi fis-saqajn hi d-dijabete li twassal biex fost oħrajn il-pazjenti jitilfu s-sens tal-ħass. “Jirfsu fuq pin u ma jindunawx jew biċ-ċirkulazzjoni batuta, ikollhom ferita u ma tistax tfiq għax m’għandhiex biżżejjed demm nieżel għas-sieq bażikament.”

Is-Sinjura Midolo qalet li qed jiżdiedu l-każijiet ta’ pazjenti jkollhom jinqatgħulhom is-swaba’ ta’ saqajhom minħabba z-zokkor. “Kultant jibdew minn xi ħaġa vera żgħira bħal selħa, imbagħad tiżviluppa f’ferita u infezzjonijiet u l-problema tidħol ‘il ġewwa sew u mbagħad hemmhekk ikun hemm qtugħ sfortunatament.”

F’każijiet fejn l-infezzjoni tinfirex, l-intervent ta’ podjatra jaf isalva ħajja. “Jekk naqbdu ferita mill-bidu, nikkurawha u nieħdu ħsiebha, iva indirettament inkunu qegħdin insalvaw ħajja,” sostniet Midolo.

Fil-Jum Dinji tal-Podjatri, l-Assoċjazzjoni tal-Podjatri appellat biex in-nies biz-zokkor imorru għand podjatra mill-anqas darba fis-sena.

Hu stmat li f’Malta hawn madwar 100 podjatra, bil-maġġoranza tagħhom jaħdmu mal-Gvern.

Aħbarijiet Oħra
Parlament

L-Ispeaker Anġlu Farrugia f’ruling li ta fil-bidu tas-seduta Parlamentari qal li prima facie hemm każ ta’ ksur ta’ privileġġ mid-deputat Nazzjonalista Jason Azzopardi fil-konfront tad-Deputat Chris Cardona. Dr Cardona talab…

Politika

L-ex Ministru Justyne Caruana qalet li se terġa’ tikkontesta fl-elezzjoni li jmiss u żżid il-maġġoranza f’Għawdex. Fuq post fuq Facebook hija rringrazzjat lil kull min qed juriha soliderjetà f’dan iż-żmien…

Politika

Il-Ministru għal Għawdex, Clint Camilleri ta xi kummenti lil TVM qabel ma ltaqa’ l-Kabinett dalgħodu. Huwa qal li se jassigura li l-Ministeru ta’ Għawdex se jkun Ministeru ta’ kulħadd, tal-Għawdxin…

Politika

Veteran fil-politika mal-Partit Laburista, elett fi tmien elezzjonijiet ġenerali konsekuttivi, deputat għal aktar minn tnejn u tletin sena u b’esperjenza fil-kabinett f’żewġ leġislaturi, l-Avukat Anton Refalo nghata l-ġurament tal-ħatra mill-President…

Aktar