Waqt il-Kafé
Rajt Kollox Jinbidel… (jew ma nbidel xejn?)

WAQT IL-KAFÉ… ma’ Joe Julian Farrugia

 

Herbert Ganado kien kiteb “Rajt Malta Tinbidel” dwar il-bidliet li ra f’pajjiżna tul ħajtu. Kulħadd ra xi tip ta’ tibdil matul is-snin tal-ħajja, imqar fina nfusna, fil-mod kif ngħixu, fis-saħħa tagħna, insomma f’kollox, mhux l-inqas fil-ħajja ta’ madwarna. Ħa nipprova niftakar f’bidliet rajt jien…

Rajt id-dinja tinbidel… minn pjaneta f’nofs gwerra bierda bejn żewġ super-potenzi għal ordni dinji ġdid li mhux dejjem jgħix f’ordni. Għax qatt ma niftakar żmien bla gwerer, jew bla inġustizzji u theddid ’l hemm u ’l hawn. L-affarijiet inbidlu, jekk hux għall-aħjar jew le ma nafx.

Rajt l-Ewropa tinbidel… m’għadhomx jeżistu pajjiżi bħall-Ġermanja tal-Punent u tal-Lvant, iċ-Ċekoslovakkja, l-Unjoni Sovjetika u l-Jugoslavja. Meta nsemmi dawn il-pajjiżi ma’ uliedi qisni qed nitkellem fuq xi erba’ sekli ilu. Il-maġġoranza tal-Ewropa ingħaqdet… u diġà hemm min irid jinfired.

Rajt lil pajjiżi jinbidel…twelidt taħt l-Ingliżi u llum Malta tmexxi lilha nnifisha. Niftakar żmien il-Gvernatur Ġenerali u llum għandna l-Presidenti Maltin. Ma tantx niftakarha l-Indipendenza iżda żgur niftakar li fi tfuliti kienu jagħtuna bandiera u borża ħelu kull sena. Niftakar tajjeb ir-Repubblika, l-Ħelsien u d-dħul ta’ Malta fl-Ewropa. Rajt pajjiżi jinbidel b’kull mod… rajt xejriet pożittivi ta’ xogħol, edukazzjoni u standard ta’ ħajja aħjar… iżda rajt ukoll veduti mill-isbaħ jinqerdu, rħula jingħaqdu f’ġungla waħda tal-konkrit… affarijiet li aħjar ma rajthom xejn!

Rajt il-ħajja tinbidel anke fir-raħal u fit-triq… niftakar it-tfal jilgħabu barra, naqbżu minn għalqa għal oħra, indawru xi bicca mitluqa bil-ġebel biex nagħmlu grawnd tal-futbol, niġru b’xi scooter kollu storbju magħmul minn biċċtejn injam u żewġ roti tal-ħadid… nilgħabu, nidħku, “niġġieldu” taparsi… u l-ħin ma jgħaddi qatt. It-tfal ta’ llum dejjem itellqu mal-ħajja… wiċċhom mal-ħġieġa tal-laptop jew tal-mobile jikkomunikaw mad-dinja kollha… imma solitarji… u bilkemm ikellmuk imqar fuq il-mejda tal-ikel.

Rajt ħafna affarijiet jinbidlu f’ħajti… qabel kont irqiq ħafna u issa għandi żaqq qisni mara ħobla… imma m’hemmx x’tagħmel la għandi mara taf issajjar.

U, bilħaqq, issa anke dak li nara f’ħajti qed jinbidel ukoll… għax jekk ikun fil-viċin, irrid nilbislu n-nuċċali.

Aħbarijiet Oħra
Għawdex

F’Għawdex tnieda servizz ta’ emerġenza ġdid għall-pubbliku li se jopera wara l-ħinijiet tal-uffiċċju, fi tmiem il-ġimgħa kif ukoll fil-btajjel pubbliċi. Dan is-servizz, li beda fuq inizjattiva tal-fergħa Għawdxija tal-Fondazzjoni għal…

Annimali

F’dan iż-żmien tas-sena ħafna jsibu ħin biex jagħmlu atti ta’ imħabba jew solidarjetà mal-oħrajn. Artista Franċiża li tgħix Malta ddeċidiet li ttella’ wirja b’pitturi biex bil-flus li tiġbor mill-bejgħ tagħhom,…

Mużika

Il-kunċert tal-President għas-Sena l-Ġdida se jżomm mat-tradizzjoni u jsir fl-Epifanija fis-6 ta’ Jannar f’Dar il-Mediterran għall-konferenzi l-Belt. Il-kunċert b’kollaborazzjoni ma’ Festival Malta u l-Orkestra Filarmonika ta’ Malta se jsir b’risq…

Kronaka

L-awtoritajiet tal-Faċilità Korrettiva ta’ Kordin qed jinvestigaw il-mewt ta’ priġunier Malti ta’ 26 sena li nstab mejjet. Television Malta jinsab infurmat li l-priġunier neħħa ħajtu. Fi stqarrija maħruġa mill-Faċilità Korrettiva…

Aktar