Kultura
Restawrat l-orgni tal-Bażilika tal-Isla

Restawrat l-orgni tal-Bażilika tal-Isla – orgni Ġermaniż li nħadem wara t-Tieni Gwerra Dinjija.

Qabel sar ir-restawr mill-inġinier u restawratur Robert Buhagiar . . . 25% biss tal-orgni tal-Bażilika tal-Isla kien jaħdem. L-inġinier Buhagiar spjega li dan l-orgni, li nħadem wara t-Tieni Gwerra Dinjija, għandu ħoss differenti minn dak ta’ orgnijiet Taljani, li nsibu ħafna minnhom fil-knejjes Maltin. Dan huwa orgni Ġermaniż.

Ir-restawratur, Robert Buhagiar qal li “il-ħoss tiegħu hu differenti minn orgnijiet Taljani bħal ta’ Mascioni u Tamburini, li hawn iktar minnhom fil-gżejjer tagħna milli orgnijiet Ġermaniżi imma dawn l-orgnijiet Ġermaniżi għandhom ħoss daqsxejn brillanti fuq in-neo barokk u allura jagħtu daqsxejn ta’ varjetà fil-palette mużikali tal-orgnijiet li nsibu f’pajjiżna.”

L-inġinier Buhagiar qal li x-xogħol fuq l-orgni, li sar b’finanzjament mit-Tarzna ta’ Palumbo, ħa madwar sitt xhur. Żied li ġiet restawrata u tnaddfet kull parti tal-orgni sabiex il-ħoss li joħroġ minnu jkun tajjeb.

Ir-restawratur, Robert Buhagiar qal li “l-ewwel ġew restawrati l-imnifaħ, imbagħad ġew restawrati l-windchests, li fuqhom ipoġġu s-sfafar. Dawn fihom ħafna valvoli, jekk dawn il-valvoli ma jaħdmux tajjeb is-suffara ma tistax idoqq sew, u mbagħad fl-aħħar nett ġew restawrati s-sfafar, li nġiebu fenj kellhom għafis fejn kellhom ħmieġ tnaddfu u ġew restawrati u ġibthom idoqqu sew.”

L-akbar sfida għar-restawratur kienet il-mod ta’ kif inhu mibni dan l-orgni fil-gallarija tal-bażilika, b’mod partikolari l-aċċess għalih.

Ir-restawratur, Robert Buhagiar qal li “għax peress li qiegħed maħdum fl-għoli biex ikun jista’ jippermetti aċċess għall-bieb li hawn fil-gallarija tal-faċċata tal-knisja dan l-orgni kellu jinħadem b’mod kompatt ħafna u anke fil-għoli.”

Ix-xogħol sar f’diversi fażijiet . . . bix-xogħol intemm bl-intonazzjoni tal-isfafar, 762 suffara b’kollox, li d-daqs tagħhom ivarja minn tmien piedi għal ċentimetru, li ġew iċċekkjati waħda waħda għall-intonazzjoni, sakemm fl-aħħar saret l-akkordatura tal-istrument.

Aħbarijiet Oħra

Il-Professur Alexiei Dingli qal li għalkemm it-teknoloġija ilha magħna 70 sena mistennija tkompli tbiddel id-dinja tagħna fl-għaxar snin li ġejjin. Waqt seminar organizzat bħala parti mill-Ġimgħa għas-Servizz Pubbliku dwar il-prospetti…

F’messaġġ fil-bidu tal-ġimgħa ddedikata għas-Servizz Pubbliku, il-Prim Ministru Robert Abela qal li s-Servizz Pubbliku kien u jibqa’ s-sinsla tal-Gvern. Dr Abela rringrazzja li dawk kollha li qamu għall-okkażjoni u taw…

Il-Qorti tal-Appell Kriminali kkonfermat sentenza fil-konfront ta’ Joseph Calleja, li kien jaħdem ma’ Identity Malta. Huwa kien ġie kkundannat erba’ snin ħabs u ordnat jagħti lura €44,400 wara li nstab…

Wara li Viċi Kap tal-Partit Nazzjonalista talab biex tkun posposta l-elezzjoni għall-Kap tal-Partit Nazzjonalista, il-Kummissjoni Elettorali responsabbli mit-tmexxija tal-elezzjoni qalet li m’hemmx bażi għal din it-talba. Qalet li l-Kummissjoni Elettorali ilha…

Aktar