Barranin
Sa fl-aħħar Donald Trump jilbes il-maskra

Għall-ewwel darba minn meta faqqgħet il-pandemija, il-President Amerikan Donald Trump libes il-maskra fil-pubbliku. Huwa għamel dan meta żar l-isptar militari Walter Reed lil hinn minn Washington fejn iltaqa’ ma’ suldati midruba u dawk li jieħdu ħsiebhom.

F’kummenti li ta hekk kif ħareġ mill-White House, Donald Trump qal li hu qatt ma kellu xejn kontra l-maskri u li ħass li kellu jilbes waħda għax huwa żmien opportun li jagħmel dan.

Trump qabel kien qed jiddieħaq bl-idea li wieħed jilbes maskra u kien anki rredikola lir-rival tiegħu Joe Biden talli għamel dan.

Iżda f’kummenti li ta lill-ġurnalisti qal li ħass li kellu juri rispett lejn is-suldati midruba u jilbes maskra għaliex dawn huma nies vulnerabbli.