Toroq
Se jinbena pont fit-Telgħa ta’ Kordin biex jaqdi lill-istudenti tal-MCAST

Pont li mistenni jinbena fit-Telgħa ta’ Kordin, f’Raħal Ġdid, se jagħmilha iktar faċli għall-istudenti tal-MCAST u nies oħra biex jaqsmu din it-triq traffikuża.

Il-pont se jservi wkoll biex inaqqas il-konġestjoni tat-traffiku f’din it-triq li tiżdied bid-dwal tat-traffiku li jiġu użati kontinwament, l-iktar mill-istudenti biex jaqsmu minn u lejn il-kulleġġ.

Il-bini ta’ dan il-pont tħabbar mill-Ministru għall-Infrastruttura Ian Borg fuq il-midja soċjali, li qal li l-Gvern għandu wkoll pjani biex isebbaħ l-inħawi, u jagħmel passaġġ ġdid għall-mixi u r-roti li jgħaqqad il-pont mal-waqfiet eżistenti għall-karozzi tal-linja, li se jinbidlu biex ikunu iktar viċin il-pont u l-passaġġ.

Intqal ukoll li ż-żona se tkun attrezzata b’sistema ta’ kameras CCTV cameras u bid-dwal għal aktar sigurtà f’kull ħin tal-ġurnata.