Konsumatur
Se jogħla l-prezz tal-ħalib min-nhar it-Tnejn li ġej

Min-nhar it-Tnejn se jogħla l-prezz tal-ħalib frisk lokali. Iż-żieda fil-prezzijiet tal-prodotti BENNA jvarjaw minn żewġ ċenteżmi sa ħdax-il ċenteżmu.

Il-kumpanija Malta Dairy Products qalet li din iż-żieda kienet meħtieġa biex issostni l-għajxien tar-raħħala tal-ħalib, il-bdiewa li jkabbru l-magħlef u l-ħaddiema li jipproduċu l-ħalib.

Intant, l-Awtorità għall-Kompetizzjoni u l-Affarijiet tal-Konsumatur qalet li se tinvestiga ż-żieda mħabbra.

Il-kumpanija Malta Dairy Products ħabbret li min-nhar it-Tnejn li ġej se jiżdiedu l-prezzijiet tal-prodotti ta’ ħalib frisk li tipproduċi. Fost oħrajn, il-ħalib tal-litru tal-kartuna l-blu se jiżdied bi €0.10ċ, filwaqt li l-ħalib tal-kartuna ċ-ċilesti u l-ħalib xkumat se jiżdiedu bi €0.11ċ kull kartuna.

Il-kumpanija spjegat li minkejja żidiet fil-prezz tal-għalf fis-swieq barranin u fl-ispejjeż fl-operat, irnexxielha żżomm il-prezzijiet tal-ħalib lokali stabbli għal 7 snin. Il-kumpanija qalet li ż-żieda fil-prezzijiet tal-ħalib kienet meħtieġa biex fi kliemha ssostni l-għajxien tar-raħħala tal-ħalib, il-bdiewa li jkabbru l-magħlef u l-ħaddiema involuti fil-produzzjoni tal-ħalib filwaqt li tassigura li l-konsumatur jibqa’ jirċievi prodotti ta’ kwalità. Il-Malta Diary Products qalet li bil-prezzijiet ġodda, il-ħalib tal-Benna se jibqa’ kompetittiv meta mqabbel ma’ ħalib frisk mibjugħ f’pajjiżi oħrajn Ewropej.

Il-kumpanija kompliet tgħid li qed tillimita din iż-żieda għal mhux iktar miż-żieda ġenerali fil-prezzijiet tal-ikel, skont l-istatistika tal-Eurostat fl-aħħar 7 snin. Il-kumpanija qalet li se taħdem fuq programm ta’ mmodernizzar biex tiżgura s-sostenibbiltà ekonomika u ambjentali f’dan is-settur.

Intant, l-Awtorità tal-Kompetizzjoni u l-Affarijiet tal-Konsumatur qalet li se tiftaħ investigazzjoni biex tistabilixxi jekk dawn iż-żidiet humiex riżultat ta’ abbuż minn pożizzjoni dominanti fis-suq u bi ksur tal-liġi. L-Awtorità qalet li f’suq kompetittiv, il-kumpanija hi libera tistabilixxi l-prezzijiet għall-prodotti tagħha. Madankollu, l-Awtorità tqis li l-prodotti ta’ din il-kumpanija jista’ jkollhom pożizzjoni b’saħħitha fis-suq, b’kull żieda fil-prezzijiet tal-ħalib lokali m’għandhiex tkun ta’ detriment għall-konsumaturi.

Il-Kelliem tal-Oppożizzjoni għall-Koperattivi, Edwin Vassallo, qal li ż-żieda fil-prezz tal-ħalib tirrifletti n-nuqqas tal-Gvern li qal ma ħa l-ebda inizjattiva biex irażżan iż-żieda fl-ispejjeż tal-manifattura tal-prodotti tal-ħalib. Is-Sur Vassallo ħeġġeġ lill-Gvern ma jibqax gallarija quddiem din l-isfida.

Aħbarijiet Oħra
Kronaka

TVM jista’ jiżvela li t-testijiet tad-DNA fuq il-fdalijiet umani li kważi xahar ilu nstabu moħbija f’daħla f’sur tal-Belt huma ta’ Charlene Farrugia, it-tfajla ta’ 25 sena li kienet irrapportata nieqsa…

Kronaka

Tfajla ta’ 23 sena minn San Ġwann tinsab fil-periklu tal-mewt wara li kienet involuta f’inċident bi quad bike f’Għawdex. L-inċident seħħ għall-ħabta tat-15:00 fi Triq ir-Rabat, fin-Nadur meta tfajla ta’ 23…

Kronaka

Sewwieq ta’ mutur ġie rikoverat wara li kellu inċident f’ Triq il-Kosta għall-ħabta ta’ nofsinhar. Il-Pulizija qalet li r-raġel ta’ 42 sena mill-Ħamrun kien qed isuq mutur tal-għamla Yamaha meta…

Politika

Waqt li l-partiti politiċi ħadu l-pawża tas-sajf mid-diskorsi politiċi tal-Ħadd, baqa’ għaddej il-battibekk politiku dwar is-salarji tas-Segretarju Parlamentari bejn id-Deputat Nazzjonalista Jason Azzopardi u l-Partit Laburista. Wara li l-gvern fi…

Aktar