Saħħa
Se jsir test tal-qalb fuq kull tarbija li titwieled f’Mater Dei

Kull tarbija li titwieled fl-isptar Mater Dei se jibda jsirilha test biex jekk hemm problemi serji tal-qalb jiġu identifikati minn kmieni.

Fi żmien xahrejn, kull tarbija li titwieled fl-isptar Mater Dei se jibda jsirilha dan l-iscreening. Din il-ġimgħa beda t-taħriġ għat-tobba u l-infermiera dwar kif jużaw tagħmir ġdid u kif jinterpretaw ir-riżultati li jagħti meta jsir l-iscreening.

Id-Deputat Prim Ministru u Ministru tas-Saħħa, Chris Fearne, qal li b’din it-teknologija ġdida l-professjonisti fin-Neo Natal Pediatric Intensive Care Unit ser ikunu jistgħu jagħmlu dijanjosi aktar preċiza u kmieni ta’ kundizzjonijiet tal-qalb fit-trabi tat-twelid.

“Ikollna madwar 30, 35 tarbija fis-sena li titwieled bi problemi fil-qalb. Ħafna minnhom b’mod konvenzjonali diġà nkunu nafu bih, imma b’dan l-iscreening li qegħdin indaħħlu nkunu nistgħu naqbdu iżjed minn età kmieni problemi li jistgħu jkunu serji, u allura nkunu nistgħu nintervjennu f’età kmieni,” qal id-Deputat Prim Ministru.

Dr Fearne qal li għalkemm ħafna mir-riżorsi huma ddedikati għall-kura tal-mard, ikun ferm aħjar li wieħed jipprevjeni l-mard jew jinduna b’kundizzjoni minn kmieni qabel ma jidħlu fil-fond is-sintomi u l-kumplikazzjonijiet.

Iċ-Chairman tad-Dipartiment tal-Pedjatrija, Paul Soler, spjega li dan it-test mhux invażiv u jsir meta t-tarbija jkollha bejn 24 u 48 siegħa. Qal li t-test hu mmirat l-aktar għal bejn 10 sa 12-il tarbija fis-sena li jitwieldu b’difett fil-qalb u li jkun ta’ periklu għalihom.

“Minn dawn nafu, minn studji li saru u minn riċerka, li nofshom ma tindunax mill-bidu nett li jkollhom dan id-difett serju. B’din it-teknoloġija li se nimplimentaw, meta nużawha mal-eżami kliniku, meta t-tabib jeżamina t-tarbija, b’din it-teknoloġija iżjed nistgħu nindunaw bihom kmieni,” spjega Dr Soler.

Ir-riżultati ddokumentati minn dan it-test se jidħlu fil-file tat-tarbija.

Aħbarijiet Oħra
Avjazzjoni

Hekk kif ilbieraħ il-Malta Aviation Society ħabbret li s-sena d-dieħla l-airshow mhux se tkun tista’ ssir, bosta dilettanti tal-avjazzjoni b’nostalġja qed ixerrdu fuq il-midja soċjali ritratti u filmati tal-ispettakli tas-snin…

Kisbiet

Riċerkaturi Maltin jistgħu jibbenefikaw minn boroż ta’ studju offruti mill-gvern biex iwettqu r-riċerka ta’ dottorat u post-dottorat fil-European University Institute f’Firenze. Ftit tal-jiem ilu, Matthias Ebejer beda l-istudji tiegħu għad-dottorat….

Festi

Hija t-tradizzjoni li għandha l-għeruq tagħha fil-bidu tal-ħamsinijiet u li tiċċelebra d-devozzjoni lill-Madonna tal-Grazzja permezz ta’ pellegrinaġġ bil-muturi u r-roti. Iċ-ċelebrazzjonijiet tal-festa tal-Madonna tal-Grazzja f’Ħaż Żabbar jikkonkludu l-istaġun tal-festi tas-Sajf….

Kronaka

Kenneth Cassar ta’ 38 sena mill-Isla ġie akkużat li fil-lejl ta’ bejn is-Sibt u l-Ħadd li għadda fl-Isla saq vettura b’manjiera perikoluża, laqat tliet karozzi u baqa’ sejjer. Cassar ġie…

Aktar