Infrastruttura
Se tinbena mill-ġdid Triq l-Imġarr fin-Nadur

Min-nhar it-Tnejn se jibda x-xogħol biex Triq l-Imġarr fin-Nadur terġa’ tinbena mill-ġdid. Din it-triq arterjali hi traffikuża u tgħaqqad ir-raħal tan-Nadur mal-Port tal-Imġarr.

Dan tħabbar mill-Ministru għal Għawdex Justyne Caruana fi stqarrija li fiha ntqal kif il-proġett jinkludi l-bini mill-ġdid tat-triq, sistemi miżjuda ta’ sigurtà fit-triq biex jonqos ir-riskju tal-inċidenti u faċilitajiet biex is-servizzi neċessarji jgħaddu minn taħt it-triq.

Il-Perit Godwin Sultana – li hu responsabbli mill-proġett – spjega t-teknika tax-xogħol involut biex it-triq tinbena mill-ġdid. Qal li l-ewwel fażi tax-xogħol hi li jiġu konsolidati l-bażi tat-triq u l-ħitan li jżommuha. Wara jsiru l-gutters għas-servizzi neċessarji qabel jingħata wiċċ ġdid.

Is-Sindku tan-Nadur Edward Said laqa’ b’sodisfazzjon l-aħbar li din l-arterja prinċipali se tingħata l-attenzjoni li ħaqqha. Sostna li bħala kunsill lokali ilhom iwasslu l-ilmenti tagħhom dwar din it-triq u l-periklu abbinat magħha.

Il-Ministru Caruana qalet li l-Ministeru qed jagħti importanza lil din it-triq peress li tinsab fi stat ħażin ħafna għax tħalliet mitluqa għal diversi snin.

Il-Ministru enfasizzat li l-Ministeru għal Għawdex irid jagħmel differenza fit-toroq f’Għawdex u għalhekk għandu pjan imħejji għall-2019. Dan fid-dawl ta’ diskussjonijiet li diġà saru ma’ Infrastruttura Malta biex isir xogħol li se jitħabbar ’il quddiem.

Aħbarijiet Oħra
Ikel

Intemm l-għasir tal-għeneb għall-inbid u issa, mal-bidu tal-ħarifa, jinsab fl-aqwa tiegħu l-istaġun tal-għasir taż-żebbuġ. Għal Jesmond Psaila, tmiem Settembru jfisser il-bidu ta’ staġun li jipproduċi dak li ħafna jfittxu fuq…

Kronaka

Matul il-lejl li għadda raġel miċ-Ċili waqa’ l-baħar taħt il-lukanda Kavallieri f’San Ġiljan. Huwa nstema’ jgħajjat u jitlob l-għajnuna. Fuq il-post marru l-Pulizija, membri tad-Dipartiment tal-Protezzjoni Ċivili u tim mediku…

Lokali

Id-Dipartiment tad-Dwana qiegħed joħroġ għall-bejgħ bl-offerta eluf ta’ fliexken b’xorb alkoħoliku, li jvarjaw bejn whisky, vodka, gin, bacardi, brandy, rum, xampanja, inbejjed u birer, maqbuda mid-Dipartiment f’dawn l-aħħar xhur. Fi stqarrija, id-Dipartiment…

Aktar