Kronaka
AĠĠORNAT: Il-fdalijiet tal-katavru nstabu moħbija f’sur – suspettat raġel li kien arrestat b’attentat ta’ serqa

Il-Pulizija jidher li tinsab viċin li ssolvi omiċidju li jmur lura ħdax-il sena. Il-każ jitratta tfajla li ilha rappurtata nieqsa mill-2008 u minn investigazzjonijiet li saru fl-aħħar jiem irriżulta li kienet inqatlet. Fis-sigħat li għaddew, il-Pulizija sabet fdalijiet ta’ katavru moħbija f’sur fil-Belt u qed iżżomm arrestat raġel li hu suspettat li qatilha. L-investigazzjonijiet ħadu żvolta fl-aħħar ħamest’ijiem wara li l-istess raġel ġie arrestat dwar attentat ta’ hold up minn ħanut fil-Gżira.

F’daħla fis-sur tal-Belt, fl-akkwati ta’ wara l-lukanda Phoenicia, uffiċjali mill-Iskwadra tal-Omiċidji tal-Pulizija u tal-forensika elevaw fdalijiet fosthom diversi għadam u ras ta’ persuna. Is-sejba saret matul il-ġurnata tas-Sibt, bil-Pulizija tissuspetta li l-fdalijiet huma ta’ tfajla minn San Pawl il-Baħar li ilha nieqsa ħdax-il sena. L-uffiċjali tal-Pulizija dehru jfittxu b’reqqa u jelevaw diversi oġġetti mill-foss li fl-imgħoddi kien jintużaw bħala parkeġġ għall-vetturi, b’aċċess b’taraġ għal ħdejn il-funtana tat-tritoni.

It-tfajla, Charlene Farrugia, kienet ġiet rappurtata nieqsa fis-7 ta’ Novembru 2008 u minn dakinhar baqgħet fil-lista tal-persuni li ma nstabux. Meta ġiet irrappurtata nieqsa, Charlene Farrugia kellha 25 sena. Hi kienet dehret l-aħħar issuq karozza fil-Belt. Eżamijiet mediċi u forensiċi li se jsiru bħala parti mill-inkjesta mmexxija mill-Maġistrat Audrey Demicoli huma kruċjali biex tiġi stabbilita’ b’ċertezza l-identità tal-persuna.

Uffiċjalment, il-Pulizija qalet li qed iżżomm arrestat raġel li hu suspettat li wettaq dan id-delitt. Sorsi qrib l-istħarriġ qalu lil Television Malta li s-suspettat hu l-istess raġel li nhar it-Tnejn ipprova jwettaq hold up minn ħanut tal-bżonnijiet ta’ kuljum fi Triq Rue d’Argens, il-Gżira. Ir-raġel kien armat b’sikkina u ġie arrestat mill-Pulizija tar-Rapid Intervention Unit u waqt li kienu ħerġin bih mill-ħanut għall-vettura tas-servizz beda jgħid li ġie arrestat għal xejn.

L-istess sorsi qalu li meta r-raġel kien fil-kustodja tal-Pulizija tkellem dwar l-għibien ta’ Charlene Farrugia u allegatament indika fejn kien hemm il-fdalijiet tagħha. F’dak l-istadju, mal-Pulizija mill-għassa ta’ Tas-Sliema li kienu qed jinvestigawh dwar l-attentat ta’ hold up, daħlu fl-investigazzjoni uffiċċjali mill-Iskwadra tal-Omiċidji fi ħdan id-Dipartiment tal-Investigazzjonijiet Kriminali.

Is-sorsi qalu li l-Pulizija qed ikunu kawti ħafna u qed ikomplu jibnu l-istħarriġ fuq stqarrijiet li r-raġel għamel magħhom.

Aħbarijiet Oħra
Xogħol

Mal-bidu tas-sajf, l-aktar meta t-temperaturi jibdew jaqbżu t-30 grad celsius, tiżdied id-domanda għas-sistemi tal-arja kkundizzjonata. L-assoċjazzjoni tal-importaturi tas-sistemi tal-arja kkundizzjonata ffurmata minn disa’ importaturi qed isib diffikultà biex issib ħaddiema…

Annimali

Waħda miż-żewġ ċifiet li ġimagħtejn ilu ġew salvati wara li tgħaqqdu fi xlief mormi fil-baħar, inħelset lura fl-ambjent naturali tagħha. Birdlife Malta qalet li għalkemm kienu fortunati li ż-żewġ ċifiet…

Saħħa

Aktar minn 40 siegħa f’ġimgħa fil-post tax-xogħol u ammont kbir ta’ xogħol huma fost il-fatturi ewlenin li waslu biex żewġ terzi tal-ħaddiema li ħadu sehem fi stħarriġ lokali qalu li…

Ippjanar u bini

Erba’ għaqdiet mhux governattivi b’interessi ambjentali laqgħu regolamenti aktar stretti fir-riforma proposta tal-politika rurali. L-Assoċjazzjoni tar-Ramblers; Flimkien għal Ambjent Aħjar; Friends of the Earth; u Moviment Graffitti nnotaw b’sodisfazzjon li…

Aktar