Lokali
Missier u ibnu se jsiru saċerdoti – lissen ix-xewqa lil martu fuq is-sodda tal-mewt

X’aktarx hija bla preċedent fl-istorja tal-knisja f’Malta li missier u ibnu ser ikunu qed iservu fi ftit snin ohra fuq l-altar bħala saċerdoti. Tony Pace qed jistudja biex isir qassis djoċesan u ibnu lesta n-novizzjat biex ikun patri mas-Soċjeta’ Missjunarja ta’ San Pawl.

Imwieled il-Gudja, Tony Pace għandu 64 sena. Romol erba’ snin ilu meta martu, Joan, mietet bil-kanċer. It-tnejn kienu għalliema. Minn meta żżewġu għexu Ħal Safi. Jiddeskrivi lil Joan bħala mara b’saħħitha spiritwalment li minkejja l-flaġell tal-marda kienet ta’ kuraġġ u ispirazzjoni. Jirrakkonta li 24 siegħa qabel ma’ mietet, sejħet lill-għeżież tagħha. Bdiet l-ewwel bit-tliet uliedha: Pauline, David u Deborah.

“Sellmitilhom b’dik il-kalma kollha, skantatni, dak il-mument kważi nqisu bħala wieħed sagru,” jirrakkonta Tony. “Imbagħad ġejt jien. Qaltli ‘isma’ Ton, issa erġa’ żżewweġ ta.’ Ngħid id-dritt ħasditni, u meta tinħasad tgħid xi ħaġa li aktar biex tkun għidtha. L-ewwel li għidtilha kien ‘Joan inti ma tafnix?, ma tafx li żball darba nagħmlu jien?’ … Imma sinċerament għax ma kellix xi ngħid. Għidtilha ‘Isma’, jien saċerdot nixtieq immur.’ Donnu li dik il-kelma li kont għidt, qisu bħal meta l-ħsieb li jista’ jkun hemm is-saċerdozju ma ħallinix bi kwieti.”

Iltqajna ma’ Tony, is-Seminarju, tal-Virtù. Jinsab fit-tieni sena tal-formazzjoni saċerdotali f’kors li fil-każ tiegħu hu maħsub li jtul erba’ snin. Staqsejtu kif ħass is-sejħa għas-saċerdozju. Jispjega li ħalla marka kbira fih il-M.U.S.E.U.M. li kien membru attiv tiegħu sa meta kellu 24 sena. Qal li bl-istess mod kienet il-familja, li la darba żżewweġ iddedika ħinu għaliha, u l-fatt li flimkien ma’ martu Joan kienu impenjati f’ħafna xogħol volontarju fl-edukazzjoni, lil hinn mill-iskola fil-parroċċa ta’ Ħal Safi, fejn Tony kien imexxi l-kor.

Isejjaħ bħala providenzjali l-Kappillan ta’ Ħal Safi, il-Kanonku David Farrugia, li miegħu tkellem dwar is-sejħa għas-saċerdozju. “Għamilli l-kuntatti meħtieġa, spiċċajt għamilt id-dixxerniment, l-iscreening u x’naf jien, sakemm f’Mejju tal-2015 ġiet il-go ahead biex ngħidu hekk li nista’ nibda l-kors tal-formazzjoni għas-saċerdozju.”

It-tliet ulied żgħażagħ ta’ Tony waslu biex jieħdu l-istat tagħhom. Ibnu jinsab ukoll fit-triq biex isir saċerdot. Lesta n-novizzjat fil-Filippini mas-Soċjetà Missjunarja ta’ San Pawl. Iż-żewġ tfajliet jgħixu d-dar, b’waħda tiżżewweġ ftit xhur oħra. Tony jħoss li uliedu aċċettaw l-għażla li għamel, anke għaliex kienu mdorrijin bil-ġenituri attivi mhux fil-familja biss. “It-tfal rawha bħala tkomplija ta’ dak li dejjem għamilna f’ħajjitna.”

Tony jgħix id-dar ma’ wliedu u jitla’ s-Seminarju għal laqgħat skont programm imfassal mir-Rettur, Dun Albert Buhagiar. Matul il-ġimgħa jkun l-Università fejn bħala parti mill-formazzjoni qed isegwi kors ta’ Baċellerat fit-teoloġija. F’Ħal Safi għadu jgħin f’diversi ħidmiet fil-parroċċa.

Aħbarijiet Oħra
Lokali

Libjan ta’ 37 sena baqa’ jinżamm arrestat wara li ġie mixli li l-Ħadd li għadda aggredixxa lill-kantanta Mikaela Attard u l-ħabiba tagħha waqt li kienu Paceville. Ġie allegat li l-Libjan…

Lokali

Żewġt aħwa li jumejn ilu kienu involuti fi ġlieda f’Ħal Tarxien inżammu arrestati wara li wieġbu mhux ħatja għal sensiela ta’ akkużi fosthom li darbu gravi lil raġel ta’ 36…

Lokali

Stħarriġ professjonali, indipendenti u estensiv juri li l-ħaddiema fis-settur pubbliku f’sena jieħdu medja ta’ jum wieħed biss ta’ sick leave aktar mill-ħaddiema fis-settur privat. Filwaqt li l-ħaddiema fis-settur privat jieħdu medja ta’…

Lokali

Il-Kamra tal-Inġiniera, f’konferenza dwar in-nirien li kienet ippjanat qabel l-inċident tan-nirien tal-Ħadd li għadda li fih tilef ħajtu Gordon Spiteri, sejħet biex jiżdiedu l-miżuri fil-binjiet f’Malta kontra n-nirien. F’intervent fil-konferenza,…

Aktar