Immigrazzjoni
Sħabu xorbu l-ilma baħar u tnaqqru wieħed wieħed – hu kien rassenjat li jmut

Wara 11-il ġurnata bejn sema u ilma, Mohammed Adam Oga huwa l-unika immigrant li rnexxielu jeħlisha minn ħalq il-mewt waqt li kien qed jaqsam il-Mediterran mil-Libja, flimkien ma’ 15-il immigrant ieħor, fosthom mara tqila.

F’intervista ma’ TVM, Mohammed Adam Oga jirrakkonta kif ra lil sħabu jmutu quddiemu taħt xemx tiżreġ, filwaqt li beda jwerżaq għall-għajnuna lil kull vapur li beda jgħaddi. Hu m’għandux kliem biżżejjed biex irodd ħajr lill-awtoritajiet Maltin, għax fi kliemu baqa’ ħaj b’miraklu.

Fuq sodda fl-Isptar Mater Dei, sibna lil Mohammed Adam Oga. Bl-għajnuna ta’ interpretu, Mohammed spjegalna li hu Etjopjan u li spiċċa l-Libja għax f’pajjiżu hemm inkwiet politiku.

Jgħid li fil-Libja ġie maħtuf iktar minn darba bil-għan li jitħallsu l-flus għall-ħelsien tiegħu. Jisħaq illi kieku baqa’ fil-Libja, kien se jmut.  Għalhekk ipprova jaħrab, u fi Tripli kellem traffikant li talbu $700 biex iwasslu Malta.

Fuq id-dinghy kien hemm 15-il persuna, fosthom mara tqila mill-Ghana. Spiċċaw bla ikel u lanqas ilma. Qal li kellhom iduru għall-ilma baħar, huwa beda jixrob ftit, iżda l-oħrajn xorbu wisq.

Wara ħamest ijiem fuq il-baħar, mietu żewġ immigranti. Spjega kif kull jum li beda jgħaddi, il-baħar inbidel f’ċimiterju għall-bqija ta’ sħabu. Baqa’ jiftakar biss 10 min-nies li rahom imutu, u l-kumplament ma jiftakarx sew x’sar minnhom.

Taħt xemx taqli l-ankri, l-iġsma bdew jintnu. Jgħid li raġel mis-Somalja bl-isem ta’ Ismael li kien miegħu, beda jwaddab il-katavri l-baħar u jgħajjat għall-ajjut lill-ħelikopters u d-dgħajjes li kienu għaddejin.

Mohammed irrassenja ruħu li se jmut, u baqa’ rassennjat anki meta t-tim tas-salvataġġ niżel biex isalvah, għax id-dinghy kien imtaqqab.

Meta daħal l-isptar skopra li anke Ismail tilef ħajtu, u li hu kien l-unika immigrant li salva. Ta’ dan jirringrazzja minn qalbu lill-poplu Malti.

Għalkemm it-triq hi t-twila biex jirkupra, u ma jafx x’se jiġri fil-futur, Mohammed jgħid li jħalli d-destin tiegħu f’idejn Alla.

Aħbarijiet Oħra
Lokali

Miet jagħmel l-aktar ħaġa għal qalbu . . . jaħdem il-karrijiet tal-Karnival. Jean Paul Bonett, magħruf bħala ċ-Chippy, se jagħlaq sitt xhur mindu ħa xokk f’maħżen tal-Karnival li ħallieh tal-post….

Negozju

It-tarzna ta’ Bormla ser ikollha sidien ġodda hekk kif il-kumpanija Palumbo lesta li tbiegħ nofs l-ishma tagħha lil kumpanija MSC Cruises. Il-proċess għal dan it-trasferiment tal-ishma diġà beda tant li…

Parlament

Id-deputat Nazzjonalista u ex kap tal-Partit Nazzjonalista ppreżenta ittra ta’ riżenja minn deputat tal-Parlament Malti lill-Ispeaker tal-Kamra tad-Deputati Anġlu Farrugia fi tmiem is-seduta tat-Tlieta filgħaxija. Id-deputat Busuttil fl-aħħar diskors tiegħu…

Kurżitajiet

Żewġ persuni li kienu qed jaqsmu l-fliegu bejn Malta u Gġħawdex bil-jetskis tpaxxew mhux biss bil-veduta iżda wkoll b’qatgħa dniefel. Dan il-ħut bħal donnu kien qed itellaq biex jasal qabel…

Aktar