Lokali
Sistema elettronika għas-sejħiet tal-offerti għal kuntratti tal-Gvern

Is-servizz pubbliku ser jiffaċilità l-proċess għas-sejħiet tal-offerti b’sistema elettronika li ser tiffranka l-ħin u l-ispejjeż lill-applikanti. Il-proċedura ġiet spjegata lill-uffiċjali tal-Gvern u l-applikanti potenzjali li jitfgħu l-offerti għal kuntratti tal-Gvern.

Permezz ta’ proġett imsejjaħ European Single Procurement System, is-Servizz Pubbliku ser jissimplifika l-proċessi amministrattivi għal mijiet ta’ eluf ta’ tenders għax-xiri ta’ prodotti u servizzi meħtieġa mill-Gvern. B’din is-sistema, l-applikanti għas-sejħiet tal-offerti maħruġa mid-Dipartiment tal-Kuntratti ser jagħmlu dan b’aktar faċilità. Is-Segretarju Permanenti Prinċipali, Mario Cutajar qal li bl-investiment fit-tekonoloġija tal-informatika s-Servizz Pubbliku qed ikun aktar effiċjenti u transparenti.

Mario Cutajar qal “hawnhekk qed nitkellmu fuq tenders u xiri ieħor, il-persuna li tkun qed tittenderja ddaħħal l-informazzjoni darba u tibqa’ tintiret, jekk ovvjament ma tkunx trid tbiddel fiha”.

Is-Sur Cutajar qal li din is-sistema fiha ħafna vantaġġi fosthom li ser tiffranka lill-applikanti għat-tenders ħafna ġiri, ħin u spejjeż biex jiġbru d-dokumenti minn dipartimenti oħra għax dan ix-xogħol ser isir mid-Dipartiment tal-Kuntratti permezz tat-tekonoloġija l-ġdida.

Mario Cutajar qal “is-sistema qed tkopri wkoll il-back office. Jiġifieri ċ-ċertifikati li jkollok bżonn biex inti tehmeż mat-tender tiegħek ma jkollokx x’taqsam magħhom inti imma jiġu awtomatikament mid-Dipartiment tat-Taxxa u Dipartimenti oħra li jkollok bżonn.”

Is-Sur Cutajar qal li din is-sistema ser tiftaħ bieb ieħor għal dawk li jridu japplikaw għal tenders fl-Unjoni Ewropea għax ser tagħtihom l-informazzjoni kollha meħtieġa.

Il-Ministru tal-Finanzi, Edward Scicluna qal li d-Dipartiment tal-Kuntratti jipproċessa eluf ta’ kuntratti li s-sena l-oħra laħqu kważi €440 miljun.