Ambjent
Skopra l-ismijiet ta’ kważi elf wied madwar il-gżejjer Maltin

Riċerkatur Malti sab l-ismijiet ta’ kważi elf wied f’Malta, Għawdex u Kemmuna. Jispjega li fost affarijiet oħra, l-ismijiet tal-widien f’Malta huma klassifikati fi tlieta; dawk ġejjin minn ismijiet tan-nies, ta’ postijiet u deskrittivi.

Simon Salafia huwa riċerkatur li għal dawn l-aħħar seba’ snin fittex l-ismijiet tal-widien f’Malta, Għawdex u Kemmuna. Jispjega li meta għamel it-teżi żgħira biex jistudja għal gwida, baqgħet tikber ġo fih il-kurżità dwar il-widien li jsebbħu pajjiżna. Sal-lum is-Sur Salafia sab l-isem ta’ 980 wied.

“L-ismijiet tal-widien jistgħu jinqasmu fi 3 gruppi. Hemm dawk li l-isem tal-wied huwa l-isem tal-persuna li jaħdem l-għelieqi f’dik iż-żona, per eżempju hawnhekk fejn qegħdin aħna, viċin il-Mosta, hawn Wied Anġlu. Warajja wkoll, fejn hawn barriera, qabel kien hawn Wied li jisimha Wied Filep. It-tieni kategorija meta għandek ismijiet ta’ widien li huma deskrittivi, bħal Wied il-Għasel, Wied il-Ħarrub, Wied ir-Rummien, Wied il-Ballut. U t-tielet kategorija huma l-ismijiet tal-widien li ġejjin minn isem ieħor ta’ post, eżempju il-Wied ta’ Ħal Lija, il-Wied ta’ Ħal Qormi, l-Wied ta’ Ħal Balzan.”

Is-sur Salafia qal li ċertu ismijiet ta’ widien ma nstabux dokumentati, iżda huma magħrufa bl-isem partikolari tagħhom min-nies tal-post. Interessanti l-fatt li madwar il-pajjiż kollu, huma tlieta biss il-lokalitajiet li m’għandhomx wied.

“Hemm 3 lokalitajiet li t-topografija ma tippermettix li jkun hemm wied. Dawn huma l-Isla, Ta’ Xbiex u Santa Venera. Imbagħad hemm 2 lokalitajiet oħra, Pembroke u Tas- Sliema li għandhom wied imma s’issa għadni ma sibtx l-isem ta’ dan il-wied. Hu interessanti li l-Belt għandha 5 widien.”

Is-Sur Salafia spjega li tul iż-żmien kien hemm widien li ntilfu, fosthom dak qrib Wied il-Għasel, li kien jismu Wied Filep, li mbagħad saret barriera. Kompla jgħid li se ikompli ifittex l-ismijiet tal-widien Maltin biex jippubblika ktieb bl-ismijiet tagħhom.

Aħbarijiet Oħra
Politika

L-Opożizzjoni Nazzjonalista ppreżentat abbozz ta’ liġi dwar il-Ħatra tal-Kummissarju tal-Pulizija. Il-Kap tal-Oppożizzjoni, Adrian Delia, qal fi stqarrija li l-abbozz jipproponi tibdil fil-liġi u l-kostituzzzjoni biex il-Kummissarju tal-Pulizija jibda jinħatar bl-approvazzjoni…

Politika

Bejn nofs l-2018 u nofs is-sena li għaddiet, l-Aġenzija tal-programm ta’ ċittadinaza b’investiment irċeviet 311-il applikazzjoni, dsatax inqas mill-istess perjodu s-sena ta’ qabel, b’żidiet fl-applikazzonijiet mill-Ażja u l-Ewropa. Mindu beda l-programm,…

Trasport

Il-karozzi tal-linja tal-futur mistennija jaħdmu bl-elettriku u konxja minn dan, il-Malta Public Transport b’kollaborazzjoni mal-kumpanija Slovena, TAM varat l-ewwel karozza ta’ dan it-tip f’Malta. Il-General Manager tal-kumpanija, Konrad Pule qal…

Qorti

Impjegat f’garaxx tal-VRT spiċċa bil-liċenzja sospiża għal għaxar snin wara li ċċertifika karozza li sippost m’għaddietx mit-test. Michael Anthony Cahill miż-Żurrieq, impjegat f’garaxx tal-VRT f’Ħal Luqa, instab ħati li aċċetta…

Aktar