Storja
Skopri aktar dwar il-katakombi tal-Abbatija tad-Dejr fir-Rabat

Heritage Malta ser tagħti opportunità lill-pubbliku biex jiskopri l-katakombi tal-Abbatija tad-Dejr, fir-Rabat – sit uniku ta’ Żmien Bikri Kristjan li serva wkoll bħala monasteru tal-eremitaġġ għal patrijiet.

Imħaffer fil-blat, viċin fejn illum hemm il-qasam tad-djar tal-gvern fir-Rabat, il-katakombi tal-Abbatija tad-Dejr għandhom karateristiċi differenti minn katakombi oħrajn anke fl-istess żona tar-Rabat. Dan għaliex huma mħaffrin fil-blat fil-wiċċ u mhux taħt l-art bħal ħafna oħrajn.

Mifrux f’erbgħa ipoġew imħaffrin maġenb xulxin, l-Abbatija tad-Dejr bdiet tintuża bħala katakombi fi żmien bikri Kristjan. Janica Buhagiar minn Heritage Malta qalet li maż-żmien, il-post beda jservi bħala monasteru u baqa’ jintuża mill-inqas sas-seklu 16.

Janica Buhagiar qalet “kien jintuża minn patrijiet. Kienu eremiti li kienu jħossu li għandhom jgħixu ‘l bogħod min-nies. Kienu jgħixu ħajja sekluża hawnhekk f’dawn il-katakombi.”

Fl-1657, l-istoriku Giovanni Francesco Abela ppubblika disinn tal-katakombi u pprovda deskrizzjoni ċara tal-kappella u l-oqbra tiegħu. L-uffiċjal ta’ Heritage Malta qalet li mir-riċerka rriżulta li ntilfu numru ta’ affreski mpittra fuq l-blat għajr għal waħda li ġiet salvata.

“Affresk partikolari li kien fil-kappella meta kien monasteru li kien jirrappreżenta l-Annunzjata u l-Kruċifissjoni li issa fortunatament priżervat fil-MUŻA. Ma stajniex inħalluh hawnhekk minħabba l-ħsara li kienet issirlu” qalet Janica Buhagiar.

Nhar il-Ħadd, Heritage Malta ser tiftaħ il-bibien ta’ dawn il-katakombi għall-ewwel darba. L-aġenzija kulturali ser tingħaqad ma’ Malta Clean Up biex jitnaddaf il-ġnien li jinsab fuq il-katakombi.

Aħbarijiet Oħra
Lokali

L-Avukat Jean-Pilippe Chetcuti qal li d-ditta legali li huwa msieħeb fiha tilqa’ r-rapport li sar mill-uffiċċju tar-regolatur taċ-ċittadinanza b’investiment (IIP), b’rabta ma’ dak li xxandar minn programm televiżiv Franċiż fuq…

Kronaka

Raġel ta’ 83 sena residenti l-Fgura jinsab isofri minn ġrieħi gravi. Dan wara li dalgħodu, għall-ħabta tad-disgħa u nofs, hu ġie mtajjar. L-inċident seħħ fi Triq San Tumas fil-Fgura, meta…

Edukazzjoni

Ħafna mill-edukaturi li jaħdmu ma’ studenti b’diżabilitajiet moħbija bħal awtiżmu mhux dejjem ikunu aġġornati bl-aħħar strateġiji u metodi li għandhom jużaw biex b’mod effettiv jgħinu lill-istudenti fil-mixja edukattiva tagħhom. Konxja…

Teknoloġija

It-tixrid ta’ ritratti indiċenti permezz tal-mobile u mezzi oħra tal-midja soċjali fost it-tfal, magħruf bhala sexting, ghalkemm huwa illegali, huwa fenomenu li jiġri fost it-tfal u adolexxenti. Dan ħareġ f’konferenza…

Aktar