Lokali
Stħarriġ: Il-faxxa żagħżugħa bl-inqas interess fil-każini tal-baned

Studju li sar għall-Konferenza Nazzjonali tal-Għaqda Każini tal-Banda juri li aktar minn 80% tal-Maltin jemmnu li l-baned huma importanti biex iżommu ħajja l-kultura Maltija. Iżda l-ikbar uġigħ ta’ ras għall-kumitati tal-każini tal-baned hija l-faxxa żagħżugħa li qed turi l-inqas interess f’din il-benniena tal-kultura Maltija.

Żgħażagħ ta’ bejn it-18 u l-25 sena huma fost l-inqas li jemmnu li l-Każini tal-Baned huma importanti għall-kultura Maltija.

Dan huwa wiehed mill-punti li ħarġu mir-riċerka ta’ Dr Vincent Marmara li ġie pprezentat fil-Konferenza Nazzjonali tal-Għaqda Każini tal-Banda. Iżda l-istudji wera wkoll li l-baned għadhom f’qalb il-Maltin.

Dr Noel Camilleri, il-President tal-Għaqda Każini tal-Banda, esprima sodisfazzjon li madwar 75% tal-Maltin jemmnu l-każini tal-baned huma rilevanti, b’51%  minnhom jemmnu li huma tajbin għall-kultura Maltija u t-tradizzjonijiet.

Dwar il-bruda ta’ ħafna żgħażagħ mill-każini, Dr Camilleri rrikonoxxa li l-attivitajiet tagħhom iridu jkunu adattati għal ġenerazzjonijiet tal-lum.

Dr Noel Camilleri qal li “irridu nkunu wkoll konxji u aġġornati mal-era diġitali li ż-żgħażagħ huma tant up to date fiha”.

Il-Professur John Portelli faħħar ix-xogħol li jsir mid-89 każin tal-banda f’Malta u Għawdex, fosthom it-tagħlim mużikali, iżda ħeġġiġhom jaħdmu biex jattiraw faxex differenti ta’ nies.

John Portelli qal li “iridu jiddiversifikaw in-nies li jiġu fil-każini, mhux biss iż-żgħażagħ u t-tfal imma wkoll aktar nisa”.

L-akkademika, Dr Marie Briguglio ħeġġet lill-każini biex inaqqsu l-kwantità tal-attivitajiet u jiffukaw fuq il-kwalità tal-prodott artistiku. Qalet li l-każini għandhom jaraw lilhom infushom fil-qafas usa’ tal-pajjiż biex isaħħu l-kontribut soċjali.

Dr Briguglio qalet li “billi joffri post fejn ikollok żvog artsitiku, billi joffri post fejn tista’ sseħħ l-għaqda, qed joffri wkoll kontribut soċjo-ekonomiku.”

Il-Ministru għall-Kultura Owen Bonnici, qal li l-Gvern ser ikompli jgħin każini tal-banda u s-soċjetajiet mużikali fosthom għal xiri ta’ strumenti ġodda, restawr u inizjattivi ohra ta’ ħarsien ta’ patrimonju taghhom.

Ix-Shadow Minister għall-Kultura, Karl Gouder, qal li jinsab konxju mill-isfidi finanzjarji li jaffaċċjaw il-każini. Heġġeġ lill-Gvern biex fost oħrajn iniedi skemi speċifiċi ta’ self maħsuba għall-każini.

Aħbarijiet Oħra
Stejjer Umani

Koppja li ftit tax-xhur ilu adottat tifel mill-Indja esprimiet il-ferħ tagħha fuq is-siti soċjali, kif ukoll wasslet messaġġ biex it-tfal jiġu mgħallma iktar dwar id-diversita’, b’mod partikolari mill-ġenituri stess. Biex…

Kronaka

Viżibilment taħt xokk, Joseph Attard li lbieraħ kien fil-mira tal-ħalliel fil-ħanut tiegħu f’Ħaż-Żabbar, irrakkonta ma’ TVM kif hu, flimkien ma’ żewġt iħbieb tiegħu rreżistew il-ħalliel li anke spara b’arma tan-nar….

Kunsilli Lokali

Il-kunsilli ser ikollhom pubblikazzjoni maħsuba apposta biex tgħinhom jiksbu fondi addizzjonali minn programmi tal-Unjoni Ewropea. Dan tħabbar mis-Segretarju Parlamentari għall-Fondi Ewropej u DAaron Farrugia u s-Sur Parnis. Iż-żewġ Segretarji Parlamentari,…

Kronaka

Kuntistabbli tal-Pulizija stazzjonat fl-Iskwadra ta’ Kontra d-Droga llejla ngħata l-kura fl-isptar wara li sofra xi ġrieħi waqt il-qadi ta’ dmirijietu. Il-każ ħareġ fil-pubbliku permezz ta’ post fuq il-paġna ta’ facebook…

Aktar