Edukazzjoni
Studenti ta’ suġġetti vokazzjonali se jgawdu klassijiet b’bixra ġdida

L-istudenti fl-iskejjel sekondarji tal-Gvern li għażlu suġġetti vokazzjonali, minn Settembru li ġej se jibda jkollhom il-lezzjonijiet minn klassijiet li ngħataw bixra differenti għax ġew mgħammra b’apparat li jixbah dak li jinstab fil-postijiet tax-xogħol. Dan bil-ħsieb li joffru esperjenza prattika lill-istudenti bl-għan li jħejjuhom għad-dinja tax-xogħol.

Mis-sena skolastika li ġejja se jitilgħu għal disgħa s-suġġetti vokazzjonali mgħallma fl-iskejjel tal-Gvern.

Malli dħalt fi klassi tal-Iskola Sekondarja San Tumas More f’Santa Luċija stħajjiltni qiegħed f’ħanut tax-xagħar modern, b’għadd ta’ mirja u hairdryers ma’ kull rokna tal-klassi. F’din il-klassi tal-Hairdressing & Beauty, l-istudenti se jitgħallmu dak kollu relatat mas-sbuħija, mill-qtugħ u l-ħasil tax-xagħar sal-kura tad-dwiefer u l-wiċċ.

L-istudenti li għażlu s-suġġett Fashion & Textiles, se jsibu klassi mgħammra b’magni tal-ħjata, drappijiet u manekkini. Dawn iż-żewġ suġġetti vokazzjonali huma fost 4 suġġetti ġodda li se jiġu mgħallma mis-sena skolastika li ġejja. Iż-żewġ suġġetti l-oħra huma Retail u Media Literacy.

Klassi oħra hi fula maqsuma ma’ kċina ta’ ristorant f’lukanda, minn borom u kukers ta’ kull daqs, sa taġnijiet u platti għall-istudenti tal-Ospitalità, li se jibda jkollhom lezzjonijiet ukoll fil-lukandi.

Klassi oħra ngħatat bixra ta’ sala żgħira fi sptar mgħammra b’apparat modern li fost oħrajn se jgħin lill-istudenti tal-Health & Social Care jitgħallmu kif jittrattaw il-pazjenti.

“L-istudenti qed imissu tikka żgħira xi tfisser nursing, physiotherapy, occupational therapists. Imissu tikka żgħira dawn l-affarijiet biex jekk għada pitgħada jkollhom xewqa jistgħu anki jimxu wara l-vokazzjoni tagħhom,” qalet Michelle Abela Uffiċjal Edukattiv fil-Health & Social Care.

Din il-klassi hi mgħammra b’xawers u kċejjen żgħar biex l-istudenti jitgħallmu jsajru għat-tfal u l-anzjani filwaqt li jrawmu l-passjoni tagħhom li jaħdmu ma’ nies vulnerabbli. “Għandhom in-nappy changer. Għandhom pupi li huma reali li jibku u dawn l-affarijiet biex huma xi tfisser anki tarbija għalxiex qed tibki.”

Dawn il-klassijiet, li huma l-ewwel tax-xorta tagħhom f’Malta, qed isiru fit-12-il skola sekondarja b’investiment ta’ €10 miljun, biex l-istudenti jitgħallmu jmiddu jdejhom qabel jidħlu fid-dinja tax-xogħol.

Id-Direttur għall-Programmi ta’ Tagħlim, Tano Bugeja, spjega li l-istudenti jistgħu jpoġġu għall-eżamijet tal-O-Level anke f’dawn is-suġġetti. “Aħna nixtiequ li l-ewwel l-istudent ikompli jistudja, jispiċċa s-sekondarja u jkompli jistudja f’postijiet post-secondary biex għada pitgħada jsib job f’dan il-qasam jew oqsma simili li bih ikunu ta’ servizz għall-pajjiż.”

Is-Sur Bugeja qal li dan l-investiment fl-apparat jikkumplimenta l-investiment li sar fit-taħriġ għall-għalliema tas-suġġetti vokazzjonali bl-għan li l-istudenti jkollhom l-aqwa esperjenza edukattiva.

Aħbarijiet Oħra
Lokali

Dalgħodu l-pulizija reġgħet bagħtet għall-eks chief of staff tal-Prim Ministru, Keith Schembri. Television Malta jinsab infurmat li dalgħodu l-Pulizija mit-Taqsima tar-Reati Ekonomiċi reġgħet interrogat lis-Sur Schembri u tteħditlu wkoll stqarrija….

Politika

Il-Prim Ministru Joseph Muscat indirizza l-folla li nġabret in-Naxxar fejn qal li ”xogħlna issa li nħarsu ‘l quddiem.” Huwa qal li jinsab kburi b’dan il-moviment u f’dan kollu ”l-aħna akbar…

Kultura

Kuxjenza ambjentali qed dejjem titqawwa. Xhieda ta’ dan hi l-inizjattiva li ħadu numru ta’ għaqdiet u l-Kunsill Lokali ta’ Ħal Kirkop li din is-sena ddeċieda li jlibes il-libsa festiva lir-raħal…

Aktar