Unjoni Ewropea
Għażla urġenti għall-President tal-Kummissjoni – Tusk jibda negozjati mal-PE

L-għażla ta’ President għall-Kummissjoni Ewropea tant hija urġenti li l-President tal-Kunsill Ewropew, Donald Tusk, mil-lum stess se jiftaħ taħditiet mal-Kapijiet tal-Gruppi Politiċi fil-Parlament Ewropew. Huwa qal li se jagħmel dan b’mod immedjat hekk kif indirizza konferenza tal-aħbarijiet li ġabet fit-tmiemu is-summit Ewropew li tlaqqa’ fi Brussell.

Matul is-summit il-mexxejja Ewropej naqsu li jaqblu fuq kandidat għall-President tal-Kummissjoni Ewropea li jkun kapaċi jikseb maġġoranza kwalifikata fil-Kunsill u li jkun tajjeb biżżejjed biex jiġi approvat ukoll bla problemi mill-Parlament Ewropew.

Filwaqt li Tusk se jkun qed jiltaqa’ mar-rappreżentanti tal-Parlament Ewropew, il-kapijiet tal-Gvernijiet tas-27 stat membru, inkluż il-PM Malti Joseph Muscat, komplew huma stess jinnegozjaw b’mod informali, kemm tard matul il-lejl kif ukoll wara li għalaq is-summit.

Id-deċiżjoni finali issa ġiet posposta għal summit ieħor, li se jitlaqqa’ nhar il-Ħadd 30 ta’ Ġunju, bit-tama li l-mexxejja jkunu kkonverġew biżżejjjed biex jaqblu dwar isem wieħed, u li jkun kapaċi wkoll jikseb l-appoġġ tal-Parlament Ewropew. L-urġenza ġejja wkoll mill-fatt li l-Parlament Ewropew huwa skedat li jiltaqa’ l-ewwel darba fl-1 ta’ Lulju u dakinhar irid jagħżel President.

Sadanittant fit-tieni u l-aħħar jum tas-summit, id-diskussjoni segwiet l-aġenda, bil-mexxejja jaqblu li x-xogħol ta’ ħolqien ta’ budget u strument finanzjarju għall-pajjiżi taz-Żona Ewro fuq bażi volontarja għandu jitkompla b’urġenza. Dan il-budget ghandu jkun parti mill-pakkett globali tal-budget għas-seba’ snin sal-2027. Il-Kunsill qed jittama li n-negozjati dwaru jiġu konkluzi sal-2019.

Dwar Brexit, il-mexxejja qablu li s-27 jibqgħu magħqudin, li lesti jaħdmu mal-PM il-ġdid tar-Renju Unit ikun min ikun. Qablu wkoll fix-xewqa tagħhom li jippruvaw jevitaw Brexit li jseħħ bla ordni ta’ xejn, iżda fl-istess ħin iddikjaraw ruħhom lesti għal anki għal brexit bla ftehim. Il-President Tusk tenna l-pożizzjoni tal-UE li “mhux lesti ninnegozjaw Brexit mill-ġdid.”

Ara wkoll:

AĠĠORNAT: Ebda qbil fuq min se jkunu l-mexxejja l-ġodda wara l-ewwel jum tas-summit

Aħbarijiet Oħra
Sport

Fit-tielet logħba tagħhom fil-Kampjonat tal-Amateurs, it-tim ta’ Syria Gżira FC kiseb l-ewwel rebħa bl-iskor ta’ 3-1 kontra Fleur De Lys FC. Il-player Lucky Chizobor skurja żewġ gowls filwaqt li Julius…

Saħħa

Ilbieraħ filgħaxija għadd ta’ nies nġabru quddiem iċ-Ċentru Esplora fil-Kalkara għal mixja simbolika bħala parti mix-xahar iddedikat għall-għarfien dwar il-kanċer tas-sider, magħruf bħala Pink October. Din is-sena n-nisa u l-irġiel…

Brexit

Wara dibattitu f’sessjoni straordinarja fil-House of Commons, il-membri parlamentari ivvutaw favur mozzjoni li tobbliga lill-Prim Ministru biex jitlob estensjoni mill-Unjoni Ewropea għal Brexit. Dan sakemm il-ftehim għall-ħruġ mill-Unjoni Ewropea jiġi…

Lokali

L-invażjoni Torka fit-Tramuntana tas-Sirja ġiet ikkundannata mill-komunità Kurda f’Malta li bl-appoġġ tal-Moviment Graffitti organizzaw manifestazzjoni paċifika quddiem l-Ambaxxata Torka fil-Floriana. Huma kkundannaw dak li sejħu bħala assalt brutali u mingħajr…

Aktar