Barranin
Tfajla tinqatel minn tliet klieb il-baħar waqt vaganza fil-Bahamas

Tfajla Amerikana ta’ 21 sena tilfet ħajjitha wara li kienet attakkata minn tliet klieb il-baħar f’daqqa meta kienet qed tgħum fil-gżejjer Bahamas.

Jordan Lindsey, studenta, kienet tinsab fuq Rose Island għal vaganza flimkien mal-ġenituri tagħha, u fil-ħin tal-attakk kienet qegħda f’wiċċ l-ilma tħares lejn qiegħ il-baħar bil-maskra.

Il-ġenituri tagħha raw il-klieb il-baħar resqin lejha u bdew jgħajtulha, iżda ma semgħethomx. Il-klieb il-baħar gidmulha saqajha, l-warrani u qaċċtulha driegħ, f’attakk meqjus għal kollox stramb, u li qed jiġi investigat.

Ftit tal-ħin qabel, persuna fil-viċinanzi ħadet ritratt li juri kelb il-baħar magħruf bħala ‘tiger shark’, li huwa maħsub li attakka lil Lindsey.

Attakki bħal dawn huma tassew rari. Bejn l-2006 u l-2016 fil-Bahamas kull ma seħħew erba’ attakki minn klieb il-baħar, u wieħed minnhom biss kien fatali.