Immigrazzjoni
Tħeġġeġ biex l-UE jkollha operazzjoni ta’ tiftix u salvataġġ għall-immigranti fil-Mediterran

Twissija mill-kap il-ġdid tan-Nazzjonijiet Magħquda għad-drittijiet tal-bniedem Michelle Bachelet dwar l-abbużi li qed isiru madwar id-dinja b’mod speċjali fil-konfront tal-immigranti.  Hija ħeġġet lill-Unjoni Ewropea biex tniedi operazzjoni ddedikata apposta għat-tiftix u salvataġġ għall-immigranti fil-Baħar Mediterran.

Bachelet qalet dan meta kienet qed tindirizza għall-ewwel darba l-Kunsill tad-Drittijiet tal-Bniedem li fetaħ illum f’Geneva (l-Isvizzera) u se jibqa’ għaddej għat-tliet ġimgħat li ġejjin.  L-ex President taċ-Ċili, li kienet priġuniera politika fil-passat, saret il-Kummissarju Għoli tan-Nazzjonijiet Magħquda għad-Drittijiet tal-Bniedem iktar kmieni dan ix-xahar.

Hija pproponiet lill-UE biex tiżgura li l-immigranti jkollhom aċċess għall-ażil u ħarsien tad-drittijiet tal-bniedem, filwaqt li tat tort lill-gvern Taljan b’mod partikolari għall-imġieba tiegħu bil-politika li ma jidħlux fl-Italja vapuri ta’ għaqdiet mhux governattivi b’immigranti salvati fil-Mediterran.  Qalet li din id-deċiżjoni għandha konsegwenzi devastanti għall-persuni vulnerabbli.

Meta kienet qed tindirizza l-Kunsill, Bachelet ħabbret li se jintbagħat tim ta’ investigaturi fl-Italja lejn l-aħħar ta’ dan ix-xahar biex jinvestiga ż-żieda fil-każi ta’ vjolenza u razziżmu kontra l-immigranti, persuni ta’ karnaġġjon skura u żingari.  Id-Deputat Prim Ministru u Ministru tal-Intern Matteo Salvini kien pront iwieġeb li l-Italja mhu se tieħu ebda lezzjoni mingħand ħadd, wisq inqas min-Nazzjonijiet Magħquda.

Il-Kummissarju Għoli ġdid tan-Nazzjonijiet Magħquda għad-Drittijiet tal-Bniedem irrimarkat ukoll dwar każi oħrajn ta’ tħassib bħas-separazzjoni tal-familji immigranti mill-awtoritajiet Amerikani, l-attakki ta’ persekuzzjoni kontra l-minorità ta’ Rohingya f’Myanmar, kif ukoll fuq l-operazzjoni militari li ma qatgħet xejn fis-Sirja.

Aħbarijiet Oħra
Immigrazzjoni

Il-Partit Nazzjonalista qal fi stqarrija li l-Gvern qed ikompli juri li m’għandux pjan bil-politika tiegħu ta’ immigrazzjoni qawwija. Qal li sejbiet bħal ta’ dalgħodu fil-Marsa huma prova ta’ immigranti li…

Immigrazzjoni

Koalizzjoni ta’ 20 organizzazzjoni mhux governattiva ddeskriviet dak li ġara llum, fejn għexieren ta’ immigranti instabu jgħixu fi stalel u ġew żgumbrati, bħala “assurd u krudili fuq kull livell.” Il-koalizzjoni,…

Barranin

Joaquin Guzman, magħruf bħala El Chapo, ġie kkundannat għomru l-ħabs, u 30 sena oħra magħhom, minn Qorti fl-Istati Uniti. El Chapo ta’ 62 sena kien il-kap tal-ikbar ċirku ta’ traffikar…

Barranin

Il-kittieb Sqalli, Andrea Camilleri, miet fl-età ta’ 93 kmieni dalgħodu. Camilleri, li kien magħruf għall-kotba tiegħu tal-Kummissarju Montalbano, miet fl-isptar fejn kien rikoverat wara li kien sofra minn attakk tal-qalb…

Aktar