Il-qilla tax-xemx ħadd ma jista’ għaliha. Ġaladarba x-xhur sħan tas-sajf iġibu magħhom aktar serħan tal-moħħ, dak li jkun x’aktarx li jerħilha ‘l barra aktar spiss, jintasab fuq xi bajja sieq fuq sieq għall-frisk maġenb il-baħar u jserraħ il-menti. X’aktarx, li l-aħħar ħaġa li dak li jkun ikun irid jara b’għajnejh hija xi brama għaddejja għall-affari tagħha fuq wiċċ l-ilma.
Madanakollu, mhux kull xorta ta’ bram jagħmel il-ħsara lill-bniedem. Jeżisti bram li minkejja l-fatt li l-kobor tiegħu jwerwer ‘il-għajnejn, ma jniggiżx. Fosthom, bram magħruf bħala ‘qassata’.
F’dan l-isfond, f’kummenti lil tvm.com.mt il-bijologa marittima Sandra Agius Darmanin qalet li wieħed m’għandux jibżà mill-hekk imsejħa qassata hekk kif dan il-bram, għall-kuntrarju ta’ dak roża li spiss naraw fl-ibħra tagħna, tant iniggeż ħafif li l-bniedem ma jħoss xejn.
Dr Agius Darmanin spjegat li fost l-oħrajn il-qassata tistħajjilha bajda moqlija għall-għamla ċatta tagħha, lewnha safrani li jkanġi fl-oranġjo, kapaċi tkun kbira sa ftit anqas minn nofs metru u ġieli aktar, u minnha joħorġu għadd ta’ saqajn b’tikek vjola. Dr Agius Darmanin qalet li l-qassata kapaċi tgħum ukoll hekk kif ma ssegwix il-kurrenti tal-baħar biss.
Il-bijologa marittima żiedet tgħid li l-qassata ġeneralment tintlemaħ f’Awwissu u f’Settembru malli jibda l-istaġun tal-lampuki. Tant, li ‘l-qassata spiss isibuha bħala ‘tal-lampuki’.
Sors: Sandra Agius Darmanin
Sors: Sandra Agius Darmanin
Sors: Sandra Agius Darmanin
Sors: Sandra Agius Darmanin
Ara wkoll:
“Jekk tinżel tgħum u tarah tersaqx lejh għax twaħwaħ bl-uġigħ”
“Tistadux kif ġieb u laħaq” – riċerkatriċi tisħaq li fl-ibħra tagħna hawn ħut perikoluż