Barranin
Titħajjar tmur tiekol miegħu fil-villa li għandu Como?

Jekk ġieli ħlomt li tmur tiekol ma’ George Clooney issa ċ-ċans!  Mhux tiekol biss, iżda tieħu ritratt miegħu u ma’ martu, tgawdi x-xeni pittoreski ta’ Como, kif ukoll titjira u akkomodazzjoni bla ħlas.

L-attur Amerikan u martu Amal għadhom kif nedew konkors biex xi ħadd jirbaħ ikla fil-villa lussuża tagħhom fil-belt Taljana ta’ Como.  Biex tieħu sehem, trid tagħti donazzjoni lill-Fondazzjoni Clooney li taħdem biex tħares id-drittijiet tal-bniedem madwar id-dinja.

It-Taljani huma esklużi milli jieħdu sehem, u anke Belġjani, Kubani, Iranjani, Iraqqin, Sudaniżi, Sirjani, Tajlandiżi, ċittadini tal-Korea ta’ Fuq u ta’ Singapore.  Għalhekk jekk għandek 16-il sena u toqgħod f’xi pajjiż li mhux imsemmi hawn tista’ tipparteċipa.  Għandek ċans sal-14 ta’ Lulju.

Iktar tagħrif tista’ tiksbu mis-sit elettroniku Omaze li għandu d-dettalji kollha ta’ kif tista’ tikkompeti biċ-ċans li tirbaħ vjaġġ għal tnejn f’Como u fl-istess waqt tgħin lill-NGO ta’ Clooney.