Lokali
Tittella’ struttura tal-ħadid li se sservi bħala saqaf għall-wieħed miż-żewġ hangars f’Ħal Farruġ
Miexi ġmielu x-xogħol fil-kumpless ta’ SR Technics f’Ħal Farruġ, b’hanger li se jkun jista’ jilqa’ ajruplani tal-passiġġieri kbar bħall-A330, jibda jifforma ruħu bi struttura ta’ saqaf. Il-proġett b’investiment ta’ 40 miljun ewro mistenni jkun lest sal-aħħar kwart tas-sena.

Struttura tal-ħadid ftit iżgħar minn tul ta’ ground tal-football twaqqfet biex tiksi hangar ġdid tal-kumpanija SR Technics f’Ħal Farruġ. L-uffiċjal responsabbli mill-proġett, Peter Zammit, spjega li l-istruttura li se sservi bħala saqaf tal-hanger li jesa ajruplani kbar, hija wiesa 95 metru u sserraħ biss fuq pilastri tal-ġnub.

“Id-differenza minn hangers oħra li minflok intrama mill-ewwel fil-post tiegħu intrama fil-baxx. Hemm fil-kantuniera qed taraw dawk il-jacks sofor qed tara cables tal-pre-stressing tal-azzar għadejjin li skond id-disinn u ċertu sekwenza qed jinġibdu u t-tinda tieħu forma ta’ arkata.”

Il-proċess biex l-istruttura ħadet il-forma tagħha ħa madwar sagħtejn. Dan hu wieħed minn żewġ hangers li bejniethom jistgħu jilqgħu sa sitt ajruplani tal-passiġġieri f’daqqa. Is-sur Zammit qal li l-proġett qed isir b’investiment ta’ madwar 40 miljun ewro. “Barra dan il-hanger għandu hanger ieħor wiesa’ imma jieħu narrow body, għandu l-kolonni fin-nofs, għandna 3 bays ta b’narrow body. Għandu binja ta’ workshops li tinsab bejn iż-żewġ hangers u sservi lit-tnejn u tinsab fi stat avvanzat.”

Is-Sur Zammit qal li fil-proġett se jintużaw madwar elf u mitejn tunnellata ta’ ħadid. Il-proġett ser ikun kumplimentat b’investiment ta’ 13-il miljun ewro oħra fit-taxiway biswit ir-runway iż-żgħira biex din tkun tista tilqa ajruplani kbar tal-passiġġieri.

Waqt żjara lix-xogħlijiet, il-Ministru għall-Ekonomija Silvio Schembri ħabbar bidla fil-liġi biex kumpaniji tat-tbaħħir u l-avjazzjoni jistgħu jaqsmu l-operat tal-kumpanija f’ċelloli, kif gara fil-qasam tal-kumpaniji tal-assikurazzjoni. Qal li dan inaqqas l-element ta’ riskju. “Meta ġġib kumpaniji tal-avjazzjoni, jew vapuri jew ajruplani f’Malta tagħmilha faċli u attraneti li jużaw servizzi bħall-industrija ta’ warajna u tkompli tkabbar il-kejk ekonomiku.”

Il-General Manager ta’ SR Technics, Arthur Magri qal li x-xogħol fuq il-kumpless, mifrux fuq 20 elf metru kwadru, għandu jitlesta sal-aħħar kwart ta’ din is-sena.