Stejjer Umani
Torqod u tqum fil-biża’ li d-dar tista’ taqa’ fuqha

Anzjana ta’ 76 sena mill-Birgu spiċċat torqod u tqum fil-biża’ li parti mid-dar tista’ taqa’ fuqha minħabba nuqqas ta’ manutenzjoni. Tgħid li sid id-dar lest jirranġa d-dar imma irid jgħollilha l-kera li ma tiflaħx għaliha. L-istorja ta’ din il-mara mhix fula f’qargħa. Ċifri li TVM kiseb mill-Awtorità tad-Djar juru li hemm mil-lanqas 140 każ oħra bħalha minn fost it-3,300 applikazzjoni għal housing soċjali.

Xahar biss wara li ħa l-ħatra tiegħu bħala Kap Eżekuttiv tal-Awtorità tad-Djar, Leonid McKay jempatizza mas-sitwazzjoni diffiċli ta’ kull minn jispiċċa bejn il-mazza u l-inkwina jisternna housing soċjali. Qal lil TVM li fl-aħħar sena l-Awtorità rnexxielha tagħti biss iċ-ċavetta ta’ 74 dar lill-applikanti li kienu l-aktar każijiet urġenti. L-anzjana ta’ 76 sena mill-Birgu ilha li applikat 16-il sena u sadanittant għadha tgħix f’periklu f’dar antika fil-Birgu. Spjegatilna kif minħabba l-kunsenturi u s-saqaf maqsum fil-kamra tas-sodda spiċċat tgħix u torqod fil-kċina.

L-anzjana qalet “inġib is-siġġu hawn, bil-cushion u noqgħod nara naqra televixin. Kuljum qed norqod hekk, u din mhux nuża għax naqra twila u jkolli ħafna mbarazz fil-kamra, nibża’ li naqa’. Għax hawnhekk irrid insajjar, irid ninħasel, nagħmel ħafna xorti”.

Qaltilna li sid il-kera lest jirranġaha bil-kundizzjoni li tgħollilha l-kera.

Il-Kap Eżekuttiv tal-Awtorità tad-Djar Leonid McKay qal li kull waħda mit-3,290 applikazzjoni li hemm quddiem l-Awtorità għandhom id-diffikultajiet tagħhom. Spjega kif il-prijorità tingħata lill-familji li jkollhom l-aktar bżonn.

McKay qal “l-iktar familji li jħabbtu l-bibien tagħna huma familji li għandhom diffikultajiet minħabba mard, sfidi jew problemi ta’ saħħa mentali, ommijiet jew missirijiet li jrabbu waħidhom u għandhom dħul baxx, persuni li huma kbar fl-età, persuni li għaddew mill-proċess ta’ separazzjoni u persuni li qegħdin f’xi istituzzjonijiet jew kellhom xi dipendenzi.”

Is-sur McKay qal li minbarra ż-żieda ta’ 1,200 appartament għal akkomodazzjoni soċjali, biex itaffi l-problema ta’ nuqqas ta’ fil-provista ta’ housing, l-Awtorità tad-Djar qiegħda taħdem fuq skemi mal-privat biex tkun tista’ tiprovdi appartamenti madwar Malta għal housing soċjali.

Aħbarijiet Oħra
Droga

L-Aġenziji li jaħdmu mal-vittmi tad-droga fosthom is-Sedqa u l-Caritas huma tal-fehma li l-użu rikreattiv tal-kannabis m’għandux ikun promoss għax ikattar il-kultura favur l-abbuż tad-droga. Din il-fehma intweriet waqt il-programm Dissett…

Partit Nazzjonalista

Il-President tal-Kunsill Ġenerali tal-Partit Nazzjonalista Kristy Debono qalet fi stqarrija li sabet li 84 mill-200 firma fil-petizzjoni li titlob biex jitlaqqa’ l-Kunsill Ġenerali biex jiddiskuti l-ġejjieni tal-Kap tal-Partit Nazzjonalista huma…

Lokali

Ta’ tnax-il sena sofriet diżabilità minħabba mard u wara ħafna snin ta’ żwieġ kellha tifel bil-kundizzjoni down syndrome. Minkejja l-isfidi, Lorraine Pellicano tgħid li Thomas berkilha ħajjitha u ħerqana li…

Lokali

Meqjusa fost l-ewwel tobba f’Malta li bdiet taħdem bla heda mal-vittmi tad-droga, ħidmet it-tabiba Maria Sciberras tfakkret f’konferenza f’għeluq il-25 sena mit-twaqqif tal-Aġenzija Sedqa u fil-jum internazzjonali kontra l-abbuż u…

Aktar