Lokali
Tpinġi t-tattoos u ssewwi l-ajruplani

Tgħid li l-ispirazzjoni fl-arti ħaditha mingħand ommha, filwaqt li l-ħajra ghall-inġinerija ħaditha mingħand missierha. tvm.com.mt ltaqa’ ma’ Charlene Fenech li għaqqdet l-arti u x-xjenza f’karriera ta’ suċċess.

Għandha 32 sena, omm ta’ tifel ta’ sitt snin, inġinier tal-ajruplani ma’ Lufthansa Technik u tmexxi l-ħanut tat-tattoos wara li għamlet kors fit-tattooing fl-Ingilterra. Charlene Fenech intgħażlet bħala l-ambaxxatriċi ta’ Malta għall-Ġimgħa Ewropea tal-Ħiliet Vokazzjonali organizzata mill-Kummissjoni Ewropea. It-tema għal din is-sena hija: “Skopri t-Talent Tiegħek.”

“Jiena bdejt mill-MCAST, fejn kont mort l-Art & Design u skoprejt it-tekniċi differenti tal-arti, mill-banda l-oħra, mort tliet snin apprentista ma’ Lufthansa flimkien mal-MCAST, komplejt l-istudju fuq inġinerija u llum il-ġurnata naħdem fuq l-ajruplani wkoll,” qalet Charlene.

Din il-ġimgħa Charlene Fenech żaret diversi skejjel, fosthom l-iskola Sir Thomas Moore fiż-Żejtun, fejn kienet tattendi hija stess. Hi qasmet l-esperjenza tagħha mal-istudenti bit-tama li tħeġġiġhom jinvolvu ruħhom fl-edukazzjoni u t-taħriġ vokazzjonali.

Ċifri juru li f’Malta, 95% tal-istudenti li jiggradwaw f’kors vokazzjonali, isibu l-impjieg mingħajr wisq diffikultà.

Din hija t-tieni sena li istituzzjonijiet vokazzjonali, fosthom l-MCAST u l-Istitut għall-Istudji Turistiċi, qed jieħdu sehem fl-inizjattiva tal-Kummissjoni Ewropea maħsuba biex tagħti spinta lill-apprentistati fl-Ewropa. Charlene din il-ġimgħa se tirrappreżenta lil Malta fi Brussell fl-Għeluq tal-Ġimgħa Ewropea għall-Ħiliet Vokazzjonali.

Aħbarijiet Oħra
Politika

Fl-isfond ta’ dawn l-iżviluppi, il-President George Vella kellu laqgħat separati mal-Prim Ministru Joseph Muscat u mal-Kap tal-Oppożizzjoni Adrian Delia fil-Palazz ta’ San Anton. Il-Partit Nazzjonalista qal fi stqarrija li Dr…

Kisbiet

Tifel Għawdxi ta’ tmien snin dalgħodu sfida l-baħar qawwi meta għamel għawma minn Kemmuna għal Għawdex f’inqas minn siegħa. Liam Daly għamel din l-għawma biex iqanqal iktar għarfien dwar il-ħsara…

Riċerka u Innovazzjoni

Il-Malta Enterprise u ċ-Ċentru dwar ir-Riċerka tal-Kannabis tal-Università McGill iffirmaw ftehim għall-kollaborazzjoni fil-qasam tal-kannabis mediċinali. Il-Malta Enterprise u l-Università McGill tal-Kanada ffirmaw memorandum of understanding għall-kooperazzjoni fil-qasam tar-riċerka dwar il-mediċina…

Qorti

Ċittadin Amerikan li joqgħod tas-Sliema ġie ikkundannat sentejn ħabs sospiżi għal erba’ snin wara li ammetta l-akkużi li għamel b’kemm jiswew €72,000 fi ħsara f’żewġ lukandi f’San Ġiljan u fir-residenza…

Aktar