Waqt il-Kafé
Għala jibagħtuk issaqqi l-ħass tal-Marsa?

WAQT IL-KAFÉ… ma’ Joe Julian Farrugia

 

Mhux l-ewwel darba li bgħatna lil xi ħadd isaqqi l-ħass tal-Marsa. U meta jqabbiżhielek xi ħadd, aħjar tibgħatu jsaqqi l-ħass milli tibgħatu banda oħra.

Il-Marsa hija lokalità ċentrali. Fil-fatt kuljum, nofs Malta tgħaddi minn hemm biex tmur lejn in-naħa ta’ isfel tal-pajjiż jew viċi versa. Kull meta għaddejt minn hemm rajt siġar, fjuri u arbuxxelli fir-roundabouts, imma ħass qatt ma rajt. L-uniku ħass li kont nara kien żmien ilu, meta ftit ‘l isfel mill-kappella ta’ Mużew kien hemm il-pitkalija, u mhux ħass biss kont tara imma ħxejjex ta’ kull għamla u lewn.

Allura, ngħid jien, għala jibgħatuk issaqqi l-ħass tal-Marsa?

Fil-Marsa jiltaqgħu ħafna widien li minnhom jgħaddi l-ilma tax-xita fi triqtu lejn il-baħar fl-inħawi tal-Menqa jew f’Ta’ Ċejlu, fejn kien hemm il-Power Station sa ftit ilu. Mhux darba smajna li wara xi maltempata kbira l-Marsa għerqet. B’dak l-ilma kollu, il-ħamrija tal-Marsa hija umda u dejjem fiha l-ilma minn taħt. Kien għalhekk li fl-għelieqi kien jitkabbar kwantità kbira ta’ ħass, xitel li jeħtieġ ħafna ilma biex jikber. U f’dan l-ambjent, il-ħass qatt ma kellu għalfejn jissaqqa. Jekk tmur issaqqih tkun qiegħed taħli l-ħin.

Għalhekk jekk xi ħadd ikun diffiċli, jew jaħlilek il-ħin tibgħatu jsaqqi l-ħass tal-Marsa. Għax dik it-tisqija hija xi ħaġa li qatt ma hemm bżonnha.

Meta kont żgħir u kont ngħaddi mill-Marsa kuljum b’tal-linja, kont ninnota l-kanal tal-Marsa bil-qiegħ tiegħu aħdar u bl-ilma għaddej sajf u xitwa. Ta’ tifel, kont naħseb li kien dak il-ħass tal-Marsa. Kont inqabblu ħafna ma’ dak il-ħaxix li ġieli ssib fuq il-blat maġenb il-baħar, u li trid toqgħod attent ma tiżloqx fuqu qabel tinżel tgħum. Għax inzerta li dak ukoll ħass jgħidulu. Allura x’tort kelli?

Imma nsomma kbirt u sirt naf li mhux dak kien il-famuż ħass tal-Marsa. U la kbirt tgħallimt jien ukoll nibgħat lil min isaqqi l-ħass. U nammetti li anki lili ġieli bgħatu. Anzi lili ġieli qaluli wkoll; “Fuq ħassa għaddej!” U min jagħtihom tort?

Aħbarijiet Oħra
Lokali

7 sigaħt ilu fetħu l-postijiet tal-votazzjoni tal-Parlament Ewropew u tal-Kunsilli Lokali. Matul dan il-ħin kienu diversi li marru jivvutaw fosthom il-President George Vella, il-Prim Ministru Joseph Muscat u l-Kap tal-Oppożizzjoni…

Qorti

Raġel ta’ 49 sena mill-Gżira ma nstabtx ħati li darab ħafif lis-sieħba tiegħu wara li ħafritlu hekk kif skont hi “huwa pilastru f’ħajjitha u tixtieq li l-problemi ta’ bejniethom jiġu…

Aktar