Lokali
Zach Meli nqatel wara argument li allegatament qam minħabba li laqat tfajla

Daqqa ta’ ħarta kiefra għall-familja ta’ żagħżugħ li lbieraħ ħareġ għal-lejl ta’ divertiment f’Paceville, u ma daħalx lura d-dar. Zach Meli ta’ 24 sena mis-Swieqi kmieni dalgħodu kien il-vittma f’argument sfortunat li nqala’ fit-taraġ ta’ Paceville, kif inhi magħrufa din it-triq tant popolari maż-żgħażagħ li jiffrekwentaw din il-mekka ta’ divertiment. Miżmum mill-pulizija żagħżugħ Bulgaru ta’ 19-il sena, li mistenni jitressaq il-qorti akkużat bil-qtil ta’ Zach Meli.

Il-pulizija qed iżżomm arrestat lil Denis Davkov, żagħżugħ Bulgaru ta’ 19-il sena li joqgħod Tas-Sliema, b’rabta mal-mewt ta’ Zach Meli, li kellu 24 sena mis-Swieqi. Meli miet waqt argument li seħħ kmieni l-Ħadd filgħodu f’Paceville.

Minn tagħrif li kiseb TVM, Zach Meli tilef ħajtu x’aktarx minħabba emororġija interna kawża tad-daqqa ta’ ponn li qala’ mingħand iż-żagħżugħ Bulgaru. Din trid tiġi kkonfermata mill-awtopsja li se ssir fil-ħin li ġej.

Kollox jindika li l-Pulizija qed tqis dan il-każ bħala qtil. Kollox beda waqt argument li seħħ għall-ħabta tas-6.30am fi Triq Santu Wistin, fit-tarf tat-taraġ ta’ Triq Santa Rita, li jagħti għall-mekka tad-divertiment f’Paċeville.

Mill-istħarriġ li sar mill-Pulizija jirriżulta li ftit minuti qabel, il-vittma, waqt li kien nieżel it-taraġ laqat tfajla Maltija, li kienet fil-kumpanija ta’ żewġ ġuvintur, Malti u ma’ Denis Davkov. Kien hawn li qam l-argument, b’Davkov, allegatament qabad u dar fuq Meli u tah daqqa ta’ ponn f’nofs moħħu.

L-ewwel ma waslu fuq il-post kienu l-Pulizija mill-Għassa ta’ San Ġiljan fejn sabu liż-żagħżugħ mitluf minn sensih fuq il-bankina. Fuq il-post issejħet l-assistenza medika, b’Meli jittieħed l-Isptar Mater Dei, iżda huwa ġie ċċertifikat mejjet ftit ħin biss wara.

Il-Pulizija qalet fi stqarrija li ġabret xi barranin biex tkellimhom dwar dan il-każ. TVM huwa infurmat li l-Pulizija żammew arrestat lil Denis Davkov, li mistenni jitressaq il-Qorti t-Tnejn. Il-Pulizija saħħew l-investigazzjonijiet tagħhom permezz ta’ filmati ta’ cctv cameras li hemm fl-istess post li qabdu dak kollu li ġara.

Nhar il-Ġimgħa, fuq Facebook, Zach Meli ħalla messaġġ li fih hemm miktub li qed ngħixu għal żmien qasir u irid igawdi (“We are only here briefly and in this moment I want to allow myself joy”).

Il-firda minn ma ħuha esprimietha oħt Zach, Leonie, li f’messaġġ fuq Facebook qalet li se tibqa’ tiġġieled sal-aħħar biex issir ġustizzja għall-mewt ta’ ħuha ż-żgħir.

L-investigazzjoni dwar danil-każ qed jitmexxew mill-Assistent Kummissarju Kevin Farrugia u l-Ispettur Kurt Zahra mid-Dipartiment tal-Investigazzjonijiet Kriminali u l-Ispettur Matthew Spagnol tad-Distrett. Il-Maġistrat Claire Stafrace Zammit qed tmexxi inkjesta.

Ara wkoll:

Żagħżugħ nqatel b’daqqa ta’ponn

Zack Meli ż-żagħżugħ li nqatel b’daqqa ta’ponn

Denis Davkov iż-żagħżugħ arrestat b’rabta mal-qtil ta’ Zack Meli

Aħbarijiet Oħra
Stejjer Umani

Filmat ta’ tifel ċkejken ta’ 9 snin inxtered f’ħakka ta’ għajn mad-dinja kollha meta esprima d-dwejjaq li ħakmuh minħabba l-bullying. Fil-filmat miġbud minn ommu, Quaden Bayles jinstema’ jgħid li jrid…

Saħħa

F’Malta, fl-ajruport beda jsir screening tat-temperatura tal-ġisem tal-passiġġieri li jaslu Malta biex ikun identifikat jekk dawn għandhomx id-deni li huwa wieħed mis-sintomi tal-coronavirus. U fil-port, il-ħaddiema tax-xatt irirfjutaw li jħottu…

Għawdex

Il-Ministru għal Għawdex Clint Camilleri qal li llum beda jingħata l-konkos fil-Menqa bi tkomplija mal-ewwel saff tal-bażi, kif ukoll bdew jinfirxu l-ewwel sleeves bis-servizzi lejn il-proprjetajiet. Il-Ministru spjega li nqala’…

Lokali

Il-Gvern ħabbar li se jintroduċi skemi biex jinċentiva l-kummerċjalizzazzjoni ta’ proċess li jikkonverti l-ġebla skartata mill-kostruzzjoni għal ġebla ġdida permezz ta’ proċess ibbażat fuq riċerka tal-Fakultà tal-Inġinerija tal-Università ta’ Malta….

Aktar