Il-kumpanija Virtu Ferries qed tħeġġeġ lill-pubbliku biex jieħu vantaġġ mir-roħs fil-prezzijiet li l-istess kumpanija qed toffri biex il-Maltin iżuru Sqallija matul Settembru.

Il-Virtu Ferries stqarret li abbord il-katamaran ir-regoli kollha tad-distanza soċjali qed jiġu osservati kif xieraq, kif mitlub mill-mument straordinarju li ninsabu fih. Fost l-oħrajn, il-katamaran qed jgħabbi 40% anqas ta’ kemm jesa’ passiġġieri. Is-soltu, il-katamaran jiflaħ 900 ruħ.

Sqallija għandha ħafna x’toffri. Fost l-oħrajn, tiġbed lejha kemm lil min l-hena tiegħu joqgħod għall-kwiet fil-kampanja kif ukoll lil dawk li l-baħar ma jpartuh ma’ xejn. Tkun fejn tkun, vjaġġ Sqallija bħalissa huwa x-xoqqa f’moxtha biex tiekol ikla kif tmiss il-liġi bi prezzijiet irħas u l-prezzijiet tal-akkomodazzjoni f’dawn il-jiem huma daqstant ieħor baxxi.

Il-Virtu Ferries spjegat li f’każ li wieħed jaqta’ l-biljetti u jerġa’ jibdielu, il-kumpanija lesta li tagħti l-flus lura lill-klijent minnufih. Dak li jkun jista’ wkoll ibiddel id-data tat-tluq jew tar-ritorn bla xkiel.

Biss, qabel jitla’ abbord il-katamaran, il-pubbliku mħeġġeġ imur jagħti swab biex jiġi ttestjat għall-Covid-19 sa 72 siegħa qabel id-data tat-tluq. Ir-riżultat, ġaladarba miksub, ta’ min jieħdu miegħu.

Għal aktar tagħrif żur il-paġna ta’ Facebook ta’ Virtu Ferries.