Futbol lokali
BIL-FILMAT: Carmel Busuttil jibqa’ leġġenda…mistieden speċjali tal-klabb Belġjan, KRC Genk

Carmel Busuttil, l-ex plejer internazzjonali Malti li lagħab karriera barra minn Malta, hu l-mistieden speċjali ta’ KRC Genk, il-klabb Belġjan li miegħu lagħab fl-aqwa tal-karriera tiegħu.

TVM Sport jinsab infurmat li fil-jiem li għaddew, Busuttil telaq lejn il-Belġju wara stedina li kien irċieva mill-klabb li se jkun qed jiċċelebra it-30 sena anniversarju s-Sibt li ġej.

Ikkuntattjat minn TVM Sport, Busuttil qal: “Okkażjoni mill-isbaħ u ta’ unur kbir għalija. Għaddew tant snin u baqgħu jirrispettawni. Xi ħaġa sabiħa ħafna li wara tant snin bniedem tibqa’ tirrikonoxxieh għal dak li għamel.”

KRC Genk qed jiċċelebraw l-anniversarju ta’ meta l-klabbs rivali eterni fil-futbol Belġjan, FC Winterslag u K. Waterschei S.V. Thor Genk, ingħaqdu u saru jisimhom KRC Genk. Għal din l-okkażjoni, il-klabb stieden diversi plejers u protagonisti li kellhom x’jaqsmu mal-klabb f’dawn l-aħħar snin, iżda jidher li Busuttil baqa’ l-aktar idolu popolari mal-partitarji tagħhom u mal-futbol Belġjan.

‘Il-Bużu’ mistenni jagħmel il-kick-off tal-partita mill-kampjonat Belġjan bejn KRC Genk u Charleroi li se tintlagħab is-Sibt li ġej fis-6.00pm fil-Cristal Arena, ta’ Genk. Busuttil lagħab ma’ KRC Genk għal sitt staġuni, bejn l-1988 u l-1994 u f’dawn is-snin, minkejja li kien anki l-captain tal-iskwadra, kien anki tliet snin top scorer tal-klabb.

Il-partitarji, wara li kien telaq, kienu anki għamlulu ‘fan club’, biex jibqgħu jonorawh. Busuttil lagħab 153 partita ma’ KRC Genk u fihom skorja 57 gowl.

Carmel Busuttil jibqa’ wieħed mill-aqwa plejers li qatt ħarġu minn Malta. Hu twieled fit-29 ta’ Frar 1964 u llum għandu 53 sena. Hu beda l-karriera tiegħu ma’ Rabat Ajax bejn l-1979 u l-1987. Magħhom lagħab 106 partiti u skorja 47 gowl.  Fl-istaġun 1987/88, Busuttil lagħab 20 partita fl-Italja ma’ Verbania u skorja 8 gowls. Meta ġie lura mill-Belġju, hu lagħab 191 partita ma’ Sliema Wanderers bejn l-1994 u 2001 u magħhom skurja 78 gowl.

Carmel Busuttil lagħab ukoll 111-il partita ma’ Malta u fihom skorja 23 gowl. Hu kien l-aqwa skorer ta’ kull żmien tat-tim nazzjonali Malti, qabel ma’ Michael Mifsud, captain preżenti tat-tim nazzjonali Malti, irnexxielhu jaqbżu għal total s’issa ta’ 40 gowl. Busuttil għamel ukoll perjodu assistant kowċ tat-tim nazzjonali Malti bejn l-2007 u l-2010.

Carmel Busuttil lagħab f’dak li ħafna jsejħulu l-aqwa tim nazzjonali Malti fl-Istorja, tas-Snin ’80 taħt it-tmexxija ta’ Pippo Psaila. F’dik l-iskwadra, hu kellu miegħu plejers bħal Raymond Vella, John Buttigieg, Joe Brincat, Martin Gregory, Charlie Scerri, Joe Galea, Kristian Laferla, Nicky Saliba, Silvio Vella, Michael Degiorgio, David Carabott, Alex Azzopardi, Reggie Cini u l-mibki David Cluett. B’dan it-tim, Malta kien irnexxielha tirreġistra l-aqwa post fir-rankings tal-FIFA ta’ kull żmien meta fl-1993, tlajna sas-66 post.

Il-filmat ma’ din l-istorja dwar Carmel Busuttil qed jintuża mill-klabb ta’ KRC Genk biex jagħmlu l-promozzjoni għall-okkażjoni tat-30 sena anniversarju s-Sibt li ġej. Fih jidher Busuttil u martu Julie mal-wasla tagħhom fl-ajruport ta’ Brussell fil-Belġju, jintlaqa’ mis-sidien tal-klabb KRC Genk u mill-ġurnalisti.

Miktub minn...
Mark Attard
Ġurnalist ta' TVM Sport. Isegwi l-Isport lokali u internazzjonali. Isegwi u jirraporta l-football lokali u internazzjonali. Jippreżenta l-programmi UEFA Europa League Highlights u UEFA Champions League Highlights.
Aħbarijiet Oħra
Futbol lokali

Wara telfa minima u draw, tasal ukoll ir-rebħa għat-team nazzjonali Malti ta’ taħt id-19-il sena fil-grupp ta’ kwalifikazzjoni għall-Kampjonat Ewropew tal-kategorija. Ir-rebħa ta’ 2-1 ġiet fl-aħħar logħba tal-grupp kontra l-Litwanja:…

Futbol lokali

It-tim nazzjonali Malti ta’ taħt il-21 sena mmexxi minn Silvio Vella tilef it-tieni logħba ta’ ħbiberija kontra l-Albanija bl-iskor ta’ 3-2. Fl-ewwel logħba kontra l-Albanija tlett ijiem ilu Malta kienet…

Futbol lokali

Magħrufa s’issa tliet semifinalisti tan-knockout tal-1 diviżjoni tal-Gozo Football Association. Xewkija Tigers għaddew mal-aħħar erbgħa b’rebħa ta’ 3-1 fuq Kerċem Ajax. Xewkija tnejn minn fuq fl-ewwel taqsima b’goals ta’ Shaun…

Futbol lokali

Illejla mistennija risposta mit-team nazzjonali Malti kontra l-Gżejjer Faroe fl-aħħar partita tal-grupp kontra l-Gżejjer Faroe. L-aspettattiva għall-partita hija qawwija wara d-disfatta tas-Sibt mal-Kosovo: b’xejn inqas minn rebħa ma tissodisfa lill-kritiċi…

Aktar