Bowling
Bowling: Rebħa għal Sue Abela u Justin Caruana Scicluna fil-Kwalifikazzjoni għall-Kampjonati tal-Mediterran

Team Malta se jkun irrappreżentat fil-MBC f’Pariġi f’April minn Abela u Caruana Scicluna, flimkien ma’ Mauro Anastasi u Sara Xuereb, li t-tnejn spiċċaw it-tieni fil-kwalifiki rispettivi tal-irgiel u tan-nisa.

Il-kompetizzjoni tal-irġiel kienet waħda kkontestata sewwa matul 3 ijiem u 24 logħba missielta sal-aħħar.  Il-vantaġġ bikri mar għand  Mark Spiteri, madankollu Caruana Scicluna u Anastasi fetħu vantaġġ fit-2 jum,  biż-żewġ plejers iwasslu prestazzjonijiet mill-aqwa logħba wara logħba.

Fl-aħħar Caruana Scicluna għeleb lil Anastasi b’ differenza ferm zgħira ta’ 5pin (5205-5200), it-tnejn b’medja kbira ta ’216. Fit-tielet post spiċċa Philip Gruppetta, filwaqt li Nicholas Muscat ta ’15-il sena kellu prestazzjoni oħra eċċellenti biex spiċċa r-raba mit-22 raġel b’medja ta’ 208.

Abela u Xuereb iddominaw il-kwalifiki tan-nisa, b’Abela toħroġ rebbieħa b’medja ta’ 207 kontra il-medja ta 204 ta’ Xuereb. Ta’ min isemmi li l-istess Abela u Xuereb kienu rebħu l-midalja tad-deheb fid-doubles fl’edizzjoni tal MBC ta’ 2019. Melissa Swift spiċċat fit-tielet post wara l-għemilja tal-aħħar ġurnata biex għelbet lil Cynthia Frendo Duca b’5 pin, b’medja ta’ 195 .

L-aħħar edizzjoni tal-kampjonati saru f’April li għadda, meta t-tim Malti ġab rekord ta ’10 midalji, b’parteċipazzjoni rekord ta’ 16-il pajjiż. Il-President tal-MTBA Paul Baldacchino ddikjara li t-tim ta’ Malta se jgħaddi minn tħejjija intensiva għall-edizzjoni li jmiss.

 

Miktub minn...
TVM Sport