Boxing
Boxing: Diane Schembri Xerri se tieħu sehem fl-avveniment ‘Clash on the First’

Wara sena mimlija daqs bajda, tidher li ser tkun sena impenjattiva oħra għall-atleta prominenti Diane Schembri Xerri. Wara li kkompetiet fil-K1 ġewwa Rosolini f’Diċembru li għadda, Diane kompliet b’taħriġ intensiv sabiex nhar is-Sibt 25 ta’ Jannar terġa’ tirrappreżenta lil pajjiżna din id-darba ġewwa l-Latvja.

Schembri Xerri ser tkun qed tħabbatha ma’ Jekaterina Marcenko mill-Latvja stess f’taqbida professjonali boxing waqt l-avveniment ‘Clash on the First’. Dawn l-atleti mistennija jiġġieldu fil-kategorija tas-57 kilogramm taħt il-kappa tas-‘Super Featherweight’ f’bout ta’ erba’ rawnds ta’ żewġ minuti kull wieħed.

Diane Schembri Xerri li titħarreġ ma’ Ying Yang Team Noel Kickboxing Club ser tkun assistita mill-kowċ tagħha Noel Mercieca. Nawgurawlhom kull suċċess f’isem pajjiżna.

Miktub minn...
TVM Sport