Formula 1
Formula 1: Il-Mercedes jirbħu s-sitt kampjonat konsekuttiv tal-kostrutturi

Fil-Ġappun, il-Mercedes rebħu s-sitt kampjonat konsekuttiv tal-kostrutturi wara li s-sewwieqa tagħhom spiċċaw l-ewwel u t-tielet, bil-Ferrari jkollhom tellieqa oħra pjuttost diżappuntanti wara li Vettel u Leclerc telqu mill-ewwel żewġ postijiet fil-pole position.

Wara li għat-tielet darba fuq dan iċ-ċirkwit, il-pole position kellha ssir fil-ġurnata tat-tellieqa minħabba l-maltemp, Vettel rebaħ il-pole position, b’Leclerc jagħmel it-tieni l-aħjar ħin, u fiż-żewġ postijiet ta’ warajhom kien hemm il-Mercedes ta’ Bottas u Hamilton. Fil-ħruġ Vettel għamel jump start u b’hekk ta ċ-ċans lil Bottas jaqbżu minn warajh, filwaqt li Leclerc u Verstappen spiċċaw ħabtu f’xulxin, bis-sewwieq tar-Red Bull jitlef ħafna pożizzjonijiet, filwaqt li Leclerc kellu jidħol fil-pit minħabba ħsara fil-karozza.

Għall-kumplament tat-tellieqa Bottas baqa’ fuq quddiem, u għalkemm Hamilton prova jaqbeż lil Vettel lejn it-tmiem, il-Ġermaniż irnexxielu jżomm il-pressjoni tal-Brittaniku biex daħal it-tieni. Għal Bottas din kienet it-tielet rebħa f’dan l-istaġun, wara r-rebħiet fl-Awstralja u l-Ażerbajġan. Charles Leclerc irnexxielu jispiċċa t-tellieqa fis-sitt post, imma dan ma kienx biżżejjed biex il-Ferrari jibqgħu jiġġieldu għall-kampjonat tal-kostrutturi u b’hekk il-Mercedes setgħu jiċċelebraw suċċess ieħor matul dan l-istaġun.

Meta fadal ħamest itlielaq għal tmiem l-istaġun, Lewis Hamilton u Valtteri Bottas huma l-uniċi żewġ sewwieqa li għadhom jisfidaw għal dan il-kampjonat u allura l-Mercedes ser iwaqqfu rekord ġdid li għal sitt snin konsekuttivi jirbħu l-kampjonati tal-kostrutturi u tas-sewwieqa.

Fit-tellieqa tal-Ħadd, Albon daħal ir-raba’ fuq Red Bull, segwit minn Sainz fuq McLaren, Leclerc fuq Ferrari u Ricciardo fuq Renault.

Lewis Hamilton jinsab fl-ewwel post tal-klassifika segwit minn Valtteri Bottas, b’Charles Leclerc jinsab fit-tielet post.

Il-Grand Prix li jmiss ser isir fil-Messiku bejn il-25 u s-27 t’Ottubru.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA
Aħbarijiet Oħra
Formula 1

George Russell rebaħ it-tieni tellieqa virtwali tiegħu meta f’Monaco ħareġ rebbieħ quddiem Esteban Gutierrez u Charles Leclerc. Wara li Russell rebaħ il-pole position fix-xita, it-tellieqa bdiet b’diversi ħbit tal-karozzi, li…

Formula 1

It-timijiet tal-Formula 1 qablu dwar pakkett li se jkun qed inaqqas l-ispejjeż tagħhom sakemm id-dinja toħroġ mill-pandemija tal-coronavirus. Il-kostrutturi aċċettaw pjan biex inaqqsu l-budget tagħhom mix-xahar id-dieħel. Il-pjan ta’ tnaqqis…

Formula 1

L-ex Champion tad-Dinja tal-Formula 1, Jenson Button, qal li jinsab sorpriż ħafna u xxukkjat li Sebastian Vettel mhux se jsuq aktar mal-Ferrari. Button qal li hi ġennata sħiħa jekk Vetttel…

Formula 1

Fernando Alonso jinsab lest biex jirritorna fil-Formula 1 mill-2021. Dan qalu l-Main Adviser tiegħu Flavio Briatore. Is-sit Ingliż tal-BBC qed jirraporta li s-sewwieq Spanjol ta’ 38 sena kellu diskussjonijiet ma’…

Aktar