Formula 1
Formula 1: Lewis Hamilton ser iżur il-fabbrika sabiex jifhem x’mar ħażin fl-Awstralja

Il-Brittaniku Lewis Hamilton ser ikun qiegħed jassisti lill-mekkaniċi matul dawn il-ħmistax sabiex jgħinhom jinvestigaw x’mar ħażin fl-ewwel tellieqa ta’ dan l-istaġun fl-Awstralja. Il-ħames darbiet ċampjin tad-dinja kien l-aħjar matul il-provi uffiċjali tas-Sibt, biex irnexxielu jirbaħ l-84 pole position fil-karriera tiegħu. Imma dan kollu tar mar-riħ meta fil-bidu tat-tellieqa, Hamilton beda ħażin ħafna, tant li Valtteri Bottas qabżu sal-ewwel dawra u baqa’ fuq quddiem sa tmiem it-tellieqa b’vantaġġ komdu ħafna.

Din kienet ir-raba’ sena konsekuttiva fejn Hamilton spiċċa t-tieni f’Albert Park, u mar-raba’ lap kellu anke ħsara minima fil-karozza li tellfitu ħin prezzjuż matul il-kumplament tat-tellieqa. Wara t-tellieqa, Hamilton għamilha ċara li matul din il-ġimgħa kien ser jirritorna fl-Ewropa u jżur il-fabbrika sabiex jara eżattament x’ġara matul it-tellieqa tal-Ħadd li għadda.

Għall-Finlandiż Bottas, din kienet l-ewwel rebħa sa mill-Grand Prix f’Abu Dhabi sentejn ilu, u barra minn hekk ħa anke l-punt addizzjonali għaliex għamel l-aħjar lap fit-tellieqa, sistema ġdida li bdiet minn dan l-istaġun.

Lewis Hamilton kien ukoll sorpriż bil-wirja xejn konvinċenti tal-Ferrari, li wara li dehru b’saħħithom ħafna waqt l-ittestjar tal-karozza, nhar il-Ħadd li għadda spiċċaw fir-raba’ u l-ħames punt, b’madwar minuta distakk minn Bottas. L-inkwiet għat-tim tal-Mercedes jidher li jista’ jiġi miż-żagħżugħ Olandiż Max Vertsappen, li l-Ħadd irnexxielu jitla’ għall-ewwel darba fuq il-podju fl-Awstralja, bil-karozza Red Bull issa għandha magna Honda, u allura dan kien ukoll l-ewwel podju għall-Honda sa mill-GP tal-Ingilterra 11-il sena ilu.

It-tellieqa li jmiss ser tkun fl-aħħar ġurnata ta’ dan ix-xahar fil-Bahrain, u wieħed irid jara kif ser tiżvolġi t-taqtiegħa bejn il-Mercedes, ir-Red Bull u l-Ferrari. Hamilton min-naħa tiegħu qiegħed jipprova jżomm it-titlu u jirbħu għas-sitt darba, filwaqt li l-Ferrari jridu jqumu fuq tagħhom għax ma jistgħux jerġgħu jħallu lill-Mercedes jiġru bil-kampjonat kif għamlu s-sena l-oħra.

Miktub minn...
Chris Falzon
Ġurnalist ta' TVM Sport. Isegwi l-isport lokali u internazzjonali. Isegwi u jirrapporta l-futbol lokali u internazzjonali. Huwa parti mit-tim tal-produzzjoni tal-programm 90 MINUTA
Aħbarijiet Oħra
Formula 1

Lewis Hamilton rebaħ is-sitt Grand Prix tal-Ingilterra li saret illum f’Silverstone. Hamilton mar quddiem wara ftit laps. Kienet Valterri Bottas li mar fuq quddiem mal-ħruġ tat-tellieqa iżda spiċċa fit-tieni post…

Formula 1

Formula 1: Valtteri Bottas irnexielu jissorprendi lill-favorit Lewis Hamilton sabiex rebaħ il-Pole Position tal-Grand Prix ta’ Silverstone. Bottas fuq Mercedes kellu ħin ta’ 0.006 aħjar minn Hamilton li se jibda…

Formula 1

Iċ-ċirkwit ta’ Silverstone se jibqa’ parti mill-kalendarju tal-Formula 1 għal mill-inqas ħames snin oħra. Dan wara li l-Formula 1 uffiċjalment ħabbru li kien intlaħaq dan il-ftehim. Iċ-ċirkwit kien fid-dubju jkunx…

Formula 1

Il-Grand Prix ta’ Silverstone ser jibqa’ jsir għall-ħames snin li ġejjin. Din l-aħbar ingħatat mill-Formula 1 wara li ntlaħaq qbil dwar pakkett finanzjarju sabiex tibqa’ ssir it-tellieqa fl-Ingilterra. Sentejn ilu…

Aktar