X

Illum iċċelebrat il-Jum Dinji tal-Ġurnaliżmu Sportiv

Il-Media Sportiva llum qed tiċċelebra l-Jum Dinji dedikat għall-ġurnaliżmu sportiv.

L-AIPS li hi l-Assoċjazzjoni Internazzjonali tal-Media tal-Isport tagħti importanza kbira lil dan il-Jum fejn tfakkar lil dawk il-ġurnalisti kollha li ħadmu fil-passat u li għadhom qed jaħdmu għal ġid ta’ din il-professjoni.

L-AIPS kienet twaqqfet fit-2 ta’ Lulju tas-sena 1924 f’Pariġi fi Franza fejn l-ewwel laqgħa kienet saret fuq ring tal-boxing u għalhekk l-Assoċjazzjoni baqgħat għal dawn is-snin kollha ġġor l-isem bil-Franċiż: Association Internationale de la Presse Sportive.

Għal din l-okkażjoni l-President tal-AIPS it-taljan Gianni Merlo bagħat messaġġ ta’ solidarjeta’ u kuraġġ lil-media sportiva madwar id-Dinja hekk kif dan qal li qedgħin ngħixu f’era ta’ sfidi kbar biż-żieda tal-popolarita’ tal-mezzi soċjali u ż-żeida tal-Fake News.

Charles Camenzuli min naħa tiegħu li hu l-President tal-fergħa Ewropeja tal-AIPS qal li dawn huma żminijiet eċitanti għall-media tal-Isport fi żminijiet ta’ sfidi kbar b’mod partikolari sfidi teknoloġiċi fl-industrija tal-media.

Il-President tal-Għaqda Ġurnalisti Sports Sandro Micallef f’messaġġ fuq Facebook qal li l-membri tal-Media Sportiva Maltija iridu jingħaqdu aktar u jgħinu iżjed lil xulxin billi jisellfu r-riżorsi kollha irrispettivament ma liema Media House huma reġistrati. Hu tenna li fejn hemm l-għaqda hemm is-saħħa u din hi l-unija t-triq sabiex il-media sportiva tibqa’ togħla fil-kwalita’ u tgħin aktar fl-iżvilupp tal-Isport Malti.

 

Sandro Micallef :Ġurnalist ta' TVM Sport. Isegwi l-Isport lokali u internazzjonali. Jippreżenta l-programm Sports Panorama.