Futbol lokali
Kampjonat BOV Premier: l-ewwel rebħa għal Gudja Utd
Ikompli l-istaġun diżastruż ta' Birkkirkara

Gudja Utd akkwistaw l-ewwel rebħa storika fil-Kampjonat BOV Premier meta għelbu lil Birkirkara 3-2 illejla fis-Centenary Stadium fit-tkomplija tad-9 ġurnata tal-istaġun: biex laħqu lill-istess Karkariżi fit-tielet post mill-aħħar tal-klassifika u tefgħuhom f’aktar inkwiet.

Birkirkara bdew b’aktar mill-pussess imma ftit kienu effettivi fl-attakk, b’ħafna mil-logħob jiżvolġi f’nofs il-ground: tant li kellna nistennew sal-25 minuta għall-ewwel xutt fil-lasta, konklużjoni ċentrali ta’ Alba għal Birkirkara salvata minn Debono.

Tliet minuti wara Gudja fil-vantaġġ bl-ewwel azzjoni vera tagħhom: ġirja fuq ix-xellug ta’ Winchester li bil-veloċità tiegħu għeleb lid-difiża Karkariża, daħal fil-kaxxa u tefa’ għan-nofs fejn l-ewwel tentattiv ta’ Gabriel Mensah kien salvat minn Hogg, imma t-tieni wieħed spiċċa fir-rokna tax-xibka

Man-nofs siegħa logħob, il-partita kellha tiġi nterrotta għal diversi minuti sakemm ingħata kura fil-pitch Allan Miranda ta’ Gudja wara li deher jintlaqat minn Prado f’tentattiv ta’ rovexxata fil-kaxxa. Ferm sfortunat Miranda li kellu jħalli l-logħba b’rasu nfaxxata ftit minuti biss wara li kien ħa post il-captain ta’ Gudja Jonathan Bondin li wkoll kien weġġa’.

Mat-tkomplija tal-logħob flick ta’ Falcone għal Birkirkara, jilqa’ Debono: imma fil-41 minuta kien l-istess attakkant Arġentin li ġab id-draw għal Birkirkara, bid-daqqa ta’ ras tiegħu mill-kross ta’ Prado tqarraq għal kollox b’Debono.

Fis-7 minuti mogħtija żejda għall-ewwel taqsima minħabba l-inċident t’aktar kmieni, Gudja darbtejn għal ftit ma reġgħux marru minn fuq: l-ewwel meta xutt ta’ Friggieri minn tarf il-kaxxa stampa mal-mimduda, imbagħad meta daqqa ta’ ras ta’ Winchester falliet il-mira bi ftit: biex l-ewwel taqsima għalqet 1-1.

It-tieni taqsima: wara daqqa ta’ ras fjakka ta’ Pepe għal Birkirkara milqugħa minn Debono, u n-naħa l-oħra Winchester imblukkat fl-aħħar wara azzjoni personali: fit-62 minuta Gudja mill-ġdid fil-vantaġġ: xutt spetttakolari ta’ Mensah minn ferm barra l-kaxxa: Hogg għal kollox maħsud iħares lejn il-ballun jispiċċa fis-saqaf tax-xibka.

Fil-71 minuta Gudja għamluhom 3-1: Pepe ġibed lil Winchester fil-kaxxa, ir-referee Philip Farrugia pront saffar għal penalty li minnu n-Numru 9 minn Trinidad ma falliiex: bl-Istripes jispiċċaw b’għaxra bit-tkeċċija ta’ Pepe għat-tieni karta safra.

Tnax-il minuta mit-tmiem xaqq tama għal Birkirkara meta reġa’ kien Falcone li bid-dawra tefa’ fix-xibka mill-kross tas-sostitut Michael Mifsud.

Birkirkara tefgħu kollox fuq l-attakk ifittxu d-draw imma t-tentattivi tagħhom ma sabux xorti; anzi kien Jimenez li waħdu f’kontrattakk tefa’ ċentimetri barra: biex l-iskor finali baqa’ Birkirkara 2, Gudja 3

Iż-żewġ timijiet bdew b’din il-formazzjoni:

Birkirkara: Andrew Hogg, Enrico Pepe, Maurizio Vella, Roderick Briffa (captain), Federico Falcone, Cain Attard, Henrique Prado Caio, Oscar Carmiello, Miguel Angel Alba (58′ Michael Mifsud), Ryan Fenech, Isaac Ntow

Coach: Andrè Paus

Gudja Utd: Jonathan Debono, Jonathan Bondin (captain) (28′ Allan Miranda, 35′ Llywelyn Cremona), Zachary Cassar, Miguel Attard, Aidan Friggieri (77′ Jusstin Grioli), Rundell Winchester, Gabriel Mensah, Anderson de Barros, Miguel Jimenez, Hubert Vella, Juan Bolanos

Coach: Josef Mansueto

Referee: Philip Farrugia

Attendenza: 438

BOV Player tal-Logħba: Gabriel Mensah

Miktub minn...
Peter Cossai
Kap ta' TVM Sport. Isegwi l-Isport lokali u internazzjonali. Isegwi u jirraporta l-football lokali u internazzjonali. Jippreżenta l-programm 90 Minuta.
Aħbarijiet Oħra
Futbol lokali

Il-bord tal-liċenzi tal-MFA ikkonferma d-deċiżjoni li Floriana jirrappreżentaw lil Malta fil-UEFA Champions League l-istaġun li ġej. Il-konferma tħabbret f’laqgħa tal-kunsill tal-Malta Football Association illejla, bil-president tal-assoċjazzjoni Bjorn Vassallo jgħid li…

Futbol lokali

It-Taljan Gaetano Farruggio nħatar Direttur Tekniku ta’ Sliema Wanderers FC. Fi stqarrija, Sliema Wanderers FC għamlu din l-aħbar uffiċjali. Farruggio ħadem mal-kowċ Giovanni Tedesco fl-istaġun 2018/19 ma’ Hamrun Spartans FC….

Futbol lokali

Floriana FC se jkunu qed jirrapreżentaw lil Malta fil-UEFA Champions League fl-istaġun li ġej. Dan wara li fil-Kunsill tal-MFA tal-lum tħabbar li l-Bord tal-Liċenzji kkonferma l-ħruġ tal-liċenzja tagħhom. Floriana FC…

Futbol lokali

Il-Ministru għat-Turiżmu u l-Protezzjoni tal-Konsumatur Julia Farrugia Portelli żaret l-istadium nazzjonali u l-kumpless sportiv tal-Malta Football Association f’Ta’ Qali fuq stedina tal-istess MFA. F’din iż-żjara, saret laqgħa fejn fiha ġew…

Aktar