Futbol lokali
Kampjonat BOV tal-Ewwel Diviżjoni: Qormi – Vittoriosa Stars posposta minħabba qtugħ ta’ dawl fil-Victor Tedesco Stadium

It-tieni partita tal-ġurnata mill-Kampjonat BOV tal-Ewwel Diviżjoni tal-lum ġiet posposta minħabba qtugħ ta’ dawl f’waħda mill-floodlights tal-Victor Tedesco Stadium fil-Ħamrun.

L-inċident seħħ fis-47 minuta hekk kif kienet għadha kif bdiet it-tieni taqsima.

Sa dak il-ħin, l-iskor kien għadu ma nfetaħx.

Daniel Casha, ir-referee tal-partita flimkien mal-assistenti stennew 15-il minuta bit-tama li titranġa s-sitwazzjoni.

Madankollu, diversi tentattivi biex tiġi rranġata s-sitwazzjoni sfaw inutli.

Sorsi ta’ TVM Sport, filwaqt li wrew il-frustrazzjoni tagħhom li se jkollhom jerġgħu jmorru jilagħbu taqsima waħda biss f’data li tikkonferma l-MFA, ikkonfermaw li d-dawl reġa’ beda ġej lura għan-normal meta l-plejers u r-referees kienu diġà nħaslu u bdew ħerġien ‘il barra mill-istadium.

Fl-ewwel partita tal-ġurnata, Fgura United għelbu lil Żebbuġ Rangers bi skor ta’ 1-0. Il-gowl tal-partita skurjaħ Gilbert Martin fl-40 minuta.

Miktub minn...
TVM Sport