Futbol lokali
Kampjonat null jew kulħadd ippremjat skont il-klassifika preżenti? Reazzjonijiet imħallta fil-futbol Malti

Hekk kif fil-preżent il-kampjonati f’Malta jinsabu wieqfa, huma ħafna dawk li ma jafux x’se jkun id-destin tal-klabbs lokali u x’se jiġri mill-istaġun li ġej.

F’dawn il-jiem, beda jiltaqa’ l-Kumitat tas-Social Dialogue li fih jinkludi l-istakeholders tal-futbol Malti. F’dan il-Kumitat hemm rappreżentanti tal-klabbs mid-diviżjonijiet kollha, rappreżentanti mill-Malta Football Players Association u rappreżentanti mill-Malta Football Association.

Jidher li l-ikbar indeċiżjonijiet jinsabu fil-fatt mit-tkomplija tal-kampjonati lokali u minn dak li se jkun qed jiġri fl-istaġun li ġej mid-diviżjonijiet kollha.

Jidher li jekk is-sitwazzjoni se tibqa’ dik li hi fil-preżent, l-MFA se tkun qiegħda tgħin lill-klabbs b’assistenza finanzjarja li se tkun qed titlob mill-FIFA u mill-UEFA. Fil-preżenti, diversi klabbs jinsabu staġnati ma jafux kif se jipproċedu bil-plejers u l-kuntratti tagħhom u dan se jkun qed iġib piż żejjed li jista’ jħalli riperkussjonijiet koroh fil-futur.

Waħda mill-aktar kwistjonijiet jaħarqu fil-preżenti hi dik dwar x’għandu jsir jekk is-sitwazzjoni tibqa’ waħda staġnata mingħajr ħjiel ta’ tkomplija.

TVMSport jinsab infurmat li l-klabbs kollha huma favur li l-partiti ma jistgħux ikomplu matul il-ġranet tas-sajf u dan minħabba kwistjonijiet ta’ saħħa u salarji tal-plejers. Għaldaqstant trid tittieħed deċiżjoni dwar jekk il-klassifika preżenti hux se tkun din finali, anki jekk fadal sitt partiti x’jintlagħbu.

Jidher li l-maġġoranza l-kbira tal-klabbs tal-kampjonat BOV Premier huma favur li jekk il-kampjonat ikollu jieqaf ħesrem, it-timijiet jiġu premjati jew ikkundannati skont il-klassifika.

Ilbieraħ, il-President tal-MFA Bjorn Vassallo qal li se tkun il-UEFA li tiddeċiedi l-eżitu finali ta’ dan kollu. Iżda wieħed irid jara jekk id-deċiżjoni tal-UEFA hux se tkun biss għall-fini tal-kompetizzjonijiet tagħha tas-sena d-dieħla u tħalli l-Assoċjazzjonijiet domestiċi jiddeċiedu jippremmjawx lit-timijiet skont il-klassifika preżenti jew inkella jiddikjarawx il-kampjonati u l-kompetizzjonijiet l-oħra nulli għal dan l-istaġun.

Jekk il-UEFA tiddeċiedi għall-kompetizzjonijiet tagħha biss ikun ifisser li Floriana FC jipparteċipaw fil-UEFA Champions League fl-istaġun li ġej, bit-timijiet li jsegwu li jmorru fil-UEFA Europa League.

Iżda mbagħad sta għall-MFA jekk tagħtix it-titlu lil Floriana u jekk jiġux relegati l-aħħar żewġ timijiet fil-klassifika u tintlagħabx ukoll il-partita tar-Relegation Play-Off.

TVMSport jinsab infurmat li l-opinjonijiet f’dan ir-rigward bejn il-klabbs huma mħallta ħafna u maqsuma, b’diversi klabbs jgħidu li kulħadd għandu jiġi premjat skont il-pożizzjoni tiegħu fil-klassifika u oħrajn li ddikjaraw anki fil-miftuħ li l-kampjonati għandhom jiġu kollha nulli.

Se tkun biss kwistjoni ta’ ħin u ġranet. Iżda d-deċiżjoni trid tittieħed malajr kemm jista’ jkun biex kulħadd ikollu direzzjoni ’il fejn sejjer u jibda jipprepara għal staġun ieħor.

Miktub minn...
TVM Sport
Aħbarijiet Oħra

Il-mira tal-imprenitur Joseph Portelli, f’isem Hamrun Spartans, hi dik li “jirbaħ il-kampjonat u jimla Strada Rjali bin-nies“. Dan qalu Portelli stess fuq il-mikrofonu ta’ TVMSport hekk kif intemmet il-konferenza tal-aħbarijiet,…

UEFA Europa League: Rd 2 ta’ Kwalifikazzjoni Hibernians…0 Fehérvár…….1 Goal waħdani mas-siegħa logħob ra lil Hibernians eliminati fit-2 Round ta’ Kwalifikazzjoni tal-UEFA Europa League minn Fehérvár tal-Ungerija. L-ewwel taqsima rat lill-Ungeriżi fil-parti…

L-MFA illum sejħet lill-media sabiex tagħti l-aħħar dettalji tal-preparazzjonijiet li qed issiru qabel il-bidu tal-kampjonat BOV Premier 2020/21 u r-regolamenti straordinarji li kellhom jidaħħlu f’din in-normalita’ ġdida. Is-Segretarju Ġenerali tal-MFA…

Fin-National Football Stadium ta’ Windsor Park f’Belfast, iċ-champions lokali Floriana llejla jeħduha kontra ċ-champions tal-Irlanda ta’ Fuq Linfield għal post fit-3 Round ta’ Kwalfikazzjoni tal-UEFA Europa League. Floriana sabu ruħhom…

Aktar