Futbol internazzjonali
Lionel Messi ma’ Inter? Fl-Arġentina jinsabu ċerti

Wara li Massimo Moratti, ex President ta’ Inter, fil-jiem li għaddew qal li Lionel Messi mal-Inter mhux ħolma pprojbita, il-media sportiva fl-Arġentina, illum ħarġet tirraporta li n-negozjati bejn il-partijiet kollha jinsabu għaddejjin u jinsabu kważi ċerti li l-plejer se jilgħab fl-Italja mill-istaġun li ġej.

Skont TNT Sport, il-President ta’ Inter Steven Zhang, qed jaħseb bis-serjetà dwar dan, hekk meqjus, “il-kolp tas-seklu” li jistgħu jagħmlu n-Nerazzurri li jkun ifisser li Messi u Cristiano Ronaldo lagħbu għal tal-inqas staġun wieħed flimkien fis-Serie A.

Fl-Arġentina, qed jingħad li n-negozjati biex Messi jingħaqad ma’ Inter mhux xi ħaġa impossibbli, anki minħabba l-età tal-plejer u l-fatt li ilu snin twal jilgħab fi Spanja mal-istess klabb u jixtieq bidla.

Skont l-istazzjon TNT, Messi għandu wkoll offerta minn Newell’s Old Boys fl-Arġentina iżda l-Inter qed jikkunsidraw bis-serjetà din il-possibbiltà.

Għal Inter se jkun qed jiddeppendi ħafna kif jispiċċaw f’dan l-istaġun u jekk hux se jkollhom garanziji finanzjarji b’saħħithom għal staġun ieħor.

Miktub minn...
TVM Sport